2019-10-20, 週日

【話極唔聽】三類媽媽教出忤逆仔

屋企有個忤逆仔咪話唔關自己事,小朋友唔聽話、特別叛逆好大程度都因為我地只做到自己心目中嘅「好媽媽」而非仔女心目中嘅「好媽媽」,切記以下呢幾種只係我地自以為係「好媽媽」,大家唔好成為呢幾類人啊!

20170225 6179 a1

苛刻媽媽

係小朋友角度出發,係呢類媽媽嘅教育之下,小朋友會覺得自己經常性被最親嘅人「否定」!呢樣做唔好果樣做唔好,長期處於束縛唔自由嘅狀態;小朋友天性就鍾意無拘無束,你剝奪咗小朋友最基本嘅需求唔忤逆你忤逆邊個!呢類家長首先應該退一步,比更多空間同自由度小朋友發揮,唔好過份長氣。

攀比媽媽

良性競爭同惡意比較家長一定要分清,良性競爭係指小朋友知道自己仲可以進步,下次爭取更好成績。惡意比較係令小朋友覺得自己比其他人差,下次要打低其他人證明比媽咪睇自己係掂嘅!價值觀截然不同,加上家長用其他人去比較小朋友只係家長「單方面」認為,小朋友唔會服氣,好勝嘅更會反駁「我叻過佢」,比較只會不利小朋友發展佢地嘅獨特性同自信,長期都唔順你超,自然忤逆你啦。

謙虛媽媽

無錯謙虛都會出事,正所謂物極必反,過份謙虛而小朋友又未必理解果陣,你眼中嘅行為就係打壓緊佢!當小朋友拎出拿手好戲,大家都拍爛手掌果陣,你作為最應該支持仔女嘅角色,但一完場就「邊係邊係,都唔係好叻姐」。下下咁傷害小朋友自尊自感會對你產出反感情緒,日積月累就會變成忤逆。

導致小朋友忤逆嘅原因仲有好多,不過歸因究底主因都係我地嘅教育方式得唔小朋友喜愛同歡迎,記住要做個好媽媽,不過係小朋友心目中嘅好媽媽。

圖片:網絡