網上熱話︳街市驚見藍色蟹！你有冇膽量食？內文另附揀蟹需知

一家人食飯，尤其是過時過節，不少媽媽都會大展廚藝，除了煮雞，海鮮亦是熱門菜式。近日就有網民在街市買蟹，驚見其中一隻蟹竟是藍色，然後於社交平台群組發文請教，引起不少網友留言。

新手媽媽對海鮮可謂又愛又恨，一方面想試試買新鮮海產讓仔女一飽口福，但又怕自己「唔識揀」、「畀人呃」，在琳瑯滿目的街市無從入手！最近一位網民於社交平台群組發問，表示家人在大圍街市買了一份$90的蟹，其中一隻竟是藍色的。魚檔稱藍色蟹是換殼而已，事主想知藍色蟹是否受污染。

有網友留言指出該蟹應該不是染色，科普蟹類遇基因突變會呈藍色，就如人類白化症一樣。他續指，如有疑慮可以分開都煮，熟後如果與其他蟹一樣即表示該蟹沒有染色。另亦有網友認為如擔心就不要食。

事主家人後來把蟹都煮了，亦在留言貼出食後感。她表示藍色蟹看起來和食起來都與一般蟹無異，亦沒有異味、膏也正常。

買蟹幾錢才合理？

海鮮價格在不同街市、店舖、產地、種類及是否休魚期等可以上落很大，筆者綜合網友意見，荃灣楊屋道街市、黃大仙大成街街市海鮮性價比高。以蟹來說，松葉蟹一隻可約$200-$300不等，奄仔蟹約$80-$90一斤。至於事主在大圍街市以$90買4隻，不少網友都認為她「咁平都敢買」真可謂勇氣可嘉。

以下為海鮮檔主的揀蟹指引：

1. 新鮮蟹通常「眼仔碌碌」
2. 蟹身底部色澤呈深色
3. 如揀羔蟹，蟹蓋、蟹奄較為突起會較多膏
4. 拿上手有重量，如蟹身輕很多時都較瘦少肉