【親子戰爭】同仔女係呢幾方面對抗係無意義

避戰第一位：食飯

好多時仔女係食飯時間都坐唔定，走嚟走去嗌極都唔聽！當然有部分小朋友係真係唔聽話或者反叛心態，不過作為小朋友，佢地只會係飢餓果陣先至想食嘢，所以小朋友唔攰唔餓都可能係坐唔定嘅原因。

避戰第二位：瞓晏覺

幼兒時期嘅仔女的確係要多d瞓覺，好多媽咪都會定時定候就叫仔女去瞓晏覺！見到仔女個樣明明好攰，又死都唔肯去瞓，如是者又爆發一場戰爭！

小朋友嘅諗法其實好簡單，當佢認為其他嘅事情比瞓覺重要，例如玩，自然就唔肯乖乖聽話。

避戰第三位：訓練去廁所

呢方面就純粹係睇心理同生理嘅成熟程度，好多父母會係仔女2至3歲果陣開始強行進行訓練，雖然係一件好正常嘅事，但一定要確保時機成熟，如果唔係就會好多不良影響，例如肌肉張力損害、心理陰影等。

總括而言，與其係呢幾方面同仔女不斷嗌交，不如跟住佢地思維去解決問題！透過其他活動增加仔女疲累感同飢餓感，活動過程中仲可以增進感情，自然會令仔女更聽你話！仲有部分戰爭其實都可免則免，有d問題慢慢大過就會學識，與其操之過急增加磨擦，不如確保佢地走係正確嘅方向之上。

圖片：網絡