【我愛媽媽】有小朋友之後媽咪放棄嘅事

1.放棄睡眠時間

照顧初生BB果段日子只可以用四個字嚟形容，就係「不堪回首」！隔幾個鐘就要掃風餵奶，夜晚又無啦啦喊，真係無覺好瞓，有部分小朋友仲特別早起身嘈住你陪佢地玩！唔好以為仔女大個就有覺好瞓，返學你要早過佢起身煮早餐，夜晚仲要陪佢做功課氹佢上床瞓覺，諗起都辛苦。

2.放棄鐘意嘅嘢食

有打算餵人奶甚至曾經餵過人奶的媽咪就會好認同呢一部分！望住最愛嘅日本刺身海膽都無得食果種痛苦，咪以為到仔女大返少少果陣就會無事，有時自己好鐘意食嘅嘢未必健康，唔想仔女跟住一齊食，唯有放棄埋！

3.放棄娛樂

未有小朋友之前，你可以經常同另一半去睇戲食飯，返屋企又可以睇電視玩電腦！但依家要湊仔通通都要放棄，連約朋友食餐飯都變得越嚟越少。

4.放棄做自己

我地嘅行為說話都會成為仔女模仿嘅對象，平時馬路見無車就過，某幾樣蔬菜自己明明都唔太鐘意食，係仔女面前都要強顏歡笑食曬！平時講嘢大大聲，嬲果陣仲會偶爾講一兩句粗口，依家全部都戒曬，所以點解啲人會話結咗婚個人係唔同咗，其實係有小朋友先係主因！

圖片：beth retro