【逼得太緊】以下現象好可能係因為管教太嚴

1.屋企欠缺「笑聲」

一家人相處，應該開開心心！當然唔係誇張到任何相處時段都一定要笑到合唔埋口，如果你管教過嚴，好少稱讚仔女，或者佢地受壓過度，自自然然就笑得越嚟越少！所以第一步，諗下自己屋企係咪真係欠缺「笑聲」。

2.仔女開始隱瞞

隨住仔女成長，會希望擁有自己嘅秘密同私隱都合符情理，而呢d合理嘅原因就唔係我想講嘅「隱瞞」。管教過於嚴厲，仔女會最直接「隱瞞」嘅就係畀人鬧嘅事，例如你平時會鬧佢考試差，佢地會「隱瞞」成績，或者有考試都唔同你講；甚至你問佢地問題，佢地知都會答你唔知，企圖瞞天過海。

3.唔鍾意留係屋企

呢個情況可能出現係讀緊小五或以上嘅小朋友身上居多，因為佢地有能力自行外出約朋友，而且一玩就玩到唔願返屋企，因為佢地分分鐘覺得留係屋企無隱，甚至厭惡！小朋友最鍾意同人互動，如果平時有你講，冇佢講自自然然就無咁鍾意留係屋企。

4.唔樂於表達意見

仔女成日講「是但」、「無所謂」都係一個唔好嘅現象，好多時佢地唔係真係「無所謂」，而係知道自己嘅意見左右唔到父母，或者長久以嚟自己嘅主意一直被否決所致。更大原因係父母好少比仔女自己話事，上至興趣班下至著咩衫，通通都係父母「一言堂」。

如果真係咁唔好彩，發現到仔女真係有以上問題，一定要及早改善同反思自己有冇過份專制！唔好睇小個後果，專制教育之下，仔女會變到無自信，比較自卑之餘，創意都會被抑壓，唔敢創新，嚴重更會出現抑鬱情緒。

圖片：sam deng