【俊傑新世代】穩賺的親子投資

Prof J：據我所知，你因為工作性質嘅關係，日頭可以抽到比較多時間陪伴小朋友。其實感覺如何？會唔會覺得自己算係比較幸福嘅父親？

仲尼爸爸：坦白講，幸福與否，其實都要睇吓自己願意付出幾多嘅。我哋呢行雖然返工時間比較不定時，例如不時要出席上市公司或者地產商飯局，同埋去一啲重要嘅發布會，但如果可以的話，我情願每日瞓少啲，早啲起身接個仔返學，中午再接佢放學，同埋抽多啲時間陪佢傾偈玩遊戲，就算辛苦少少都冇計。因為太太係返朝9晚7呢啲正常打工仔時間，要每晚放咗工先可以陪佢，相反我就係下晝返工，夜晚喺公司做嘢，返到屋企已經係深夜，變相就好似日夜更咁，可以輪流陪個仔玩吓遊戲、做下功課咁，然後每日中間嗰三四小時，就留畀外傭陪佢沖涼、瞓晏覺同食飯，咁就變相可以減低對外傭嘅依賴，將更多親子時光留返畀自己喇。

Prof J：老實講吖，呢樣嘢其實知易行難，好多時我見啲父母湊住小朋友，雖然人就喺佢身邊呀，但大家都拎住部手提電話係咁撳，大嘅喺度覆WhatsApp，細嘅喺度打機，甚至5、6歲細路食嘢都要工人一啖一啖餵，咁嘅陪伴就真係無乜意義喇。

仲尼爸爸：無錯呀，根據哈佛大學嘅研究指出，低質量嘅陪伴，例如心不在焉咁同小朋友傾偈、甚至一路撳手機一路陪小朋友，不但未能促進親子關係，對孩子嘅成長是甚至會形成一種變相傷害，容易讓孩子產生心理陰影。所以當陪伴小時友嘅時候，我都希望盡量同太太放低手機，暫時拋下忙碌嘅工作同大量短訊，多啲同囝囝作交心嘅對話，同佢玩嘅時候，要專心留意佢每一個舉動，再畀佢適當反應。因為你係咪真係陪緊佢，小朋友其實係感覺到㗎。

Prof J：無錯喇。高質量嘅陪伴，係要真誠咁同小朋友溝通交流，讓孩子表達觀點，尊重佢哋嘅想法和意願，父母再從旁引導，帶出正確價值觀，咁先可以享受親子時光嘛。

仲尼爸爸：我哋成日聽到人講，小朋友就係對未來最大嘅投資，無錯我好認同呢句說話。但有邊一種投資選項係穩賺不賠呢？我相信一定係有質素嘅親子陪伴時間。好多時我哋見到小朋友好鍾意痴住屋企嘅外傭，甚至連出街都情願拖住外傭而唔係父母，呢啲情景可謂相當諷刺。父母騁請外傭係希望釋放自己嘅勞動力，在外辛勞工作搵錢返嚟畀小朋友過更好嘅生活，但卻反而令小朋友過度倚賴外傭，甚至關係比父母更親密，作為父母豈不心酸？其實無他，因為小朋友「身體很誠實」，平時邊個陪得佢多、或者待得佢好，佢就會給予相等反應。所以作為忙碌嘅香港人，就算平時工作有幾忙都好，一定要盡量抽時間陪伴小朋友，給予有質素嘅陪伴時間，小朋友自然會同你有更好嘅交流，帶畀你更多歡樂，好快你就會發現呢項投資嘅回報率(Return On Investment，ROI)，係比起你買任何投資工具都更加值搏㗎喇！

作者: