【珍寶豬欄】同你一齊我就覺得幸福

呢幾日佢哋上去時，發覺B婆完全唔察覺佢哋入咗屋，佢哋除晒鞋去埋廁所岀嚟，B婆都仍然原封不動咁熟睡緊。豬爸影咗B婆相whatsapp同我講『我哋喺度咁耐，佢都冇郁過』。我覆佢『係呀，B婆聾咗啦』。所謂嘅聾咗即係好似老人家咁聽力下降，始終B婆都老了⋯

以前B婆可以同我一齊捱通頂睇電視煲劇，而家佢每晚十點前就會自己入房瞓先。

以前我一岀?，拎條鎖匙岀嚟就已經聽到屋入面嘅B婆吠住歡迎我入屋，而家我返到屋企閂埋門都會仲見到佢趴咗喺梳化瞓，有好幾次我點嘈佢都未醒，我以為佢香咗，不過望望吓見佢肚仔有起伏，就鬆一口氣講『哇，好彩未香啫，嚇死人咩！』。

以前佢會自己跳上床，而家就算我哋已經準備咗一個櫃仔俾佢做樓梯咁上床，佢都好似懶得行，會成日喺床邊叫我抱佢上床，就算佢半夜岀咗去屙夜尿，佢都一樣會叫我起身抱佢上床。

以前睇嘢好精靈，會望實我食嘢睇吓我有冇漏口跌嘢食落地，之後再飛快精準地搶食！而家我用手指住啲嘢食，佢都好似睇唔到咁，要送到埋嘴邊佢先發現有得食。

B婆老了。

有時Facebook回顧岀現以前B婆嘅相，就發覺原來B婆陪咗我哋好多年⋯提醒我要好好珍惜，因為相處嘅時間已經剩返唔係好多。

 

B婆，我唔介意你又聾又盲，唔介意晚晚要我抱你上床，可以同你一齊我就覺得幸福了。

（以上專欄由Dr-Max教材大王全力支持）