網絡騙案｜網民社交平台買公仔被騙幾十萬港幣！留意3大關鍵慎防受騙

近日有網民於社交平台Threads發文，親述網上買公仔，卻被騙走幾十萬港幣的經歷。事主表示，自己儲咗好耐錢，原本打算用來還俾屋企人嘅醫藥費，結果全部冇晒。事件發生後，佢已經喺12月10日報警。帖文入面特別提醒大家：騙徒手上有成千上萬個傀儡帳戶，仲有偽官方link，再配合同黨扮「客戶服務專員」，一步步將受害者銀行戶口嘅錢全部呃走。事主自嘲「我知我蠢，歡迎鬧我」，同時求廣傳希望提醒更多人。

社交平台騙案點樣一步步呃人？

事主解釋，如有人於社交平台睇到心儀物品，私訊賣家後，對方會要求加Line或WhatsApp繼續傾。後續騙徒會發出「偽官方連結」，如假冒平台、銀行或物流客服，甚或主動有「客服專員」聯絡，告知戶口出現異常、帳戶被封鎖，或需額外轉帳「解鎖」或「驗證」先可以出貨。

受害者一旦信以為真，按下「偽連結」及向騙徒提供驗證碼，就會被轉走銀行戶口所有金錢！

留意三大關鍵　慎防受騙

1、唔好亂撳link

真正平台或銀行絕少透過私訊或連結要求你操作。任何「官方客服」、「解鎖帳戶」連結都要極度小心，最好直接打官方電話或登入正式APP查證。

2、真正客服唔會叫你轉帳或提供完整銀行資料

銀行或正規平台唔會要求你額外匯款「解除警示」、輸入驗證碼去「確認收款」、或者截圖戶口餘額。一旦對方提出呢啲要求，即刻停止對話，並報警。

3、網購物品優先選擇可靠渠道或面交

於有第三方支付平台交易，或直接約面交。大額轉帳前，先查清賣家信用紀錄，勿因對方「催」而急住轉錢。如對方催得急、出招情勒，更要警惕！

騙徒手法日新月異，尤其熱門公仔、演唱會門票等，特別容易成為誘餌。在付款或提供個人資料前，可透過香港警務處的「防騙視伏器」手機APP或網頁版，輸入可疑電話號碼、社交媒體賬號等，實時評估詐騙風險，或致電18222查詢。