【新手爸爸】有陪月 終於有覺好瞓

我嘅意見係唔好慳少少錢，如果啱心水就請，因為隨時係你未來湊小朋友嘅老師。就係早幾個月，一家人開開心心接卓欣返屋企，估唔到只係惡夢嘅開始。

你又點估到明明醫院接返嚟好似綿羊咁乖咁靜，點解咁快變咗魔怪大吵大鬧呢？於是我同老婆加埋久疏戰陣嘅奶奶，三人輪流同魔人卓欣戰至第朝早晨，魔人卓欣先瞓著一陣，直到陪月姐姐嚟到，我地終於有覺好瞓。

陪月姐姐一嚟就指點咗好多嘢，教咗好多方法去湊卓欣，例如換片片點樣捉佢腳仔等佢定啲、點樣幫佢清潔口同牙肉、點樣快快手手又乾淨幫佢洗白白。自從嗰次之後直頭連屋企櫃上面嘅盒都放返整齊。

對於新手嘅我嚟講真係想講一句：「我今日真係學到好多野。」

當時真係聽到BB喊就手忙腳亂，個地好似震緊，個天好似就塌落黎咁，係陪月嘅呢一個月，因為老婆都仲坐月休息緊，我都慢慢上手可以一個月照顧到卓欣。而家湊BB仲可能叻過老婆添。

雖然好多野產前講座都有教過，但始終有個人係身邊教，等你可以一路學一路教你好唔同。到而家有唔少手法同習慣都由陪月姐姐教落到而家，所以一個陪月除咗幫到你照顧老婆同BB，仲係一個好好嘅老師。

作者：Davis Papa

        新手爸爸，育有一女，現職電視台導演及網路媒體創作人