【珍寶豬欄】我教唔到我個仔喎！

呢位小朋友坐坐吓開始唔耐煩，開始周圍走搵嘢玩。
佢睇中咗我哋擺出嚟嘅單張～於是佢抽起一疊散落地上，邊踩邊滑行邊叫喧。

我同小朋友講：「小朋友，唔好咁玩啲單張呀，人哋要嚟睇㗎，唔係俾你咁玩㗎。」
小朋友望望我，一於廢事啋我，再轉身拎埋其他單張散落地上。
佢媽媽由始至終都係咁自己坐埋一邊玩電話…
其他人見到咁嘅情況都搖晒頭～

當中有位先生帶佢年老爸爸嚟睇醫生嘅，先生忍唔住出聲同個媽媽講：「太太，你叫你個仔唔好再咁啦。」
媽媽望望先生，露出一副不屑嘴臉：「我教唔到我個仔喎，咁叻你教呀!」
先生望望個小朋友，再望望個媽媽，狀甚谷氣，先生企起身了！
我以為先生會衝埋去打個小朋友一身，想阻止命案發生：「先生！」
先生行去媽媽身邊，摀低身用雙眼望住媽媽。
媽媽見佢貼到咁埋，個身自然避避：「你做咩呀？」
先生喺媽媽耳邊大叫：「呀！！！！！！！呀！！！！！！」
媽媽立即掩住耳仔彈起身彈得遠遠，一臉驚慌問：「你做咩呀？你痴線㗎？喺我耳邊咁大聲嗌？」
先生冇理佢，繼續追住佢耳邊大叫：「呀！！！」
媽媽行到埋嚟登記處：「姑娘呀，佢痴線㗎。」
唔知個小朋友係咪覺得咁樣好好玩，於是小朋友又走埋嚟喺媽媽身邊大叫：「呀！！！！！！！！」
先生又『呀！！！！！』，小朋友又『呀！！！！！』，好嘈…
媽媽望住先生嘅年老爸爸問：「喂！你個仔嚟呀？嗌你個仔收聲啦！佢搞到我個仔都學埋佢啦。」