【珍寶豬欄】I need your help囉

我：「睇醫生嘅麻煩你俾身分證我啊～」
佢：「I need your help囉。」
啊！有『囉』字嘅，即係識中文啦～咁我同你講返廣東話㗎啦～
我：「請問有咩幫到小姐你？」
佢：「Do you know english？英—倫—掘—殊。你唔識嘅我講中文囉～」
唔中唔西，都唔知你做乜鬼～
我：「好呀，咁我有咩幫到你呀小姐？」
佢拎出一張卡：「你哋收呀？」
我望望：「唔收。」
佢：「你望真啲。」
我唔係賭神，賭神都要捽兩捽先變佢想要嘅牌啦，更何況我只係望！
我：「我望真咗㗎啦，我哋診所唔收呢張啊。」
佢：「So why i need your help囉。」
我覺得你要搵蕭叔叔救救你先…
我：「張卡我哋唔收嘅，我哋可以寫收據俾你啊，你再拎住收據返公司claim錢～」
佢：「公司一定要用呢張睇，拎單返去都唔會有錢拎得返。」
我：「咁我哋冇辦法啊～你去返收呢張卡嘅診所睇啦。」
佢：「佢得幾間喺呢頭，幾間我都唔會再去睇㗎啦，啲醫生有病㗎！」
會唔會有病嗰個係你呀？
我：「但係我哋真係唔收呢張卡，或者你去遠少少睇啦。」

佢：「I am sick！我咁『識』你仲叫我去遠啲睇？」

我見你咁好中氣又唔覺你好『識』…
我：「你喺度睇冇問題啊，我哋收你現金啊，你係睇嘅我就同你登記啦。」
佢拎住張卡揈：「I have the card！」
我：「我哋唔收呢張呀嘛，明唔明呀？你要睇嘅就要忘記咗呢張卡㗎啦～」
佢：「你真係有病！你哋呢頭啲人有病㗎。」
小姐離開了。
睇你個款咪又係住呢頭～大家都有病，開心冇？