【Davis Papa】新手爸爸食點心的勇氣

因為要照顧囡囡卓欣無時間？

唔係！

而係有啲點心真係會令你諗起BB嘅臭臭。因為BB便便嘅臭係有一隻好獨特的味道（有啲蛋味又有啲酸味咁），初時聞唔慣真係會有少少想嘔。

是咁的，話說有一日外賣咗啲點心返屋企同老婆食，點知就係呢次中咗伏喇。首先講下買咗咩點心先？
A.流心奶黃包
B.糯米雞
C.腸粉
D.燒賣
以上四款點心，邊樣會聯想到BB臭臭？

聰明嘅讀者，一定估到係A。當時我咬咗一啖流心奶黃包望一望個包，立即發覺唔對路。無論顏色同質感都好似卓欣BB嘅”唔唔”，然後嗰半個包就無胃口再食喇。

唔食包咁食其他嘢囉。

B.糯米雞嘞！

就當我拿起隻糯米雞想打開之際，說時遲那時快，阿嫲：哎呀！又poo poo咗送隻糯米雞畀爸爸呀? 成塊尿片咁包起上黎又幾似糯米雞喎，結果我都係食個杯麵算喇。

自從有呢個經歷之後，我兩公婆就無再食過點心啦，幾時會有勇氣再食呢？真係唔知。
唔知你哋又有啲咩得意嘅嘢形容BB便便。

Davis Papa
新手爸爸，育有一女，現職電視台導演及網路媒體創作人