【珍寶豬欄】想唔煩嘅，唔好養寵物

咁人係咪都一樣食乾糧就夠，唔應該食其他食物？因為大家啲牙都係牙啫，你啲牙特別硬淨啲？乾糧即係脫水，佢成份表入面不含水份，你有冇發覺貓本身係唔太鍾意飲水呀？因為佢哋天性係靠食肉去吸收水份，而唔係飲水補充水份。『唔係喎，我隻貓食完乾糧有去飲水㗎喎』，咁係因為佢真係好鬼死口乾呀，你食完成包餅會唔會一啖水都唔飲呀？

根本食乾糧同食濕糧都一樣有機會影響啲牙，只係睇你平時有冇同佢清潔。長期食乾糧更加會引起令一個問題，就係水份不足，有機會影響埋個腎。食乾糧冇問題，只係好似人一樣，食物唔可以係單一習慣性咁食，一定要配合埋其他食物。即係我今日俾一餐乾糧佢，下餐就係濕糧，得閒嘅有心機嘅又可以整鮮食俾佢。

寵物唔係機械人，唔係入幾粒電芯就夠，你俾乜佢食，佢嘅健康就會係點～等如人都一樣，你食幾多，食有益嘅嘢定垃圾食物，你嘅磅數你嘅身體檢查報告都會如實反映出嚟。

每隻寵物嘅習性都唔同，有啲好鍾意食乾糧有啲好鍾意飲水嘅，所以人哋嘅寵物飲食係點，並唔代表你嗰隻都一樣，最緊要係你用心慢慢觀察你嘅寵物，再為佢揀選佢鍾意嘅飲食餐單。係煩㗎～養寵物就係咁煩。想唔煩嘅，唔好養寵物，請個鐘點姐姐返嚟打掃吓屋企好過～