【珍寶豬欄】我住公屋呀～

我：「更加唔得啦！你去搵寵物酒店啊～」
佢：「我住公屋邊有錢呀？」
而家香港地住公屋先有錢喎，你唔好呃我呀～
我：「我都唔可以幫你睇住佢成個禮拜咁耐呀～我哋診所嚟㗎嘛」
佢：「咁你喺正我樓下嘛！」
隔離麵舖夠係囉，你又唔去問吓佢？
我：「我哋診所又點可以俾隻狗仔喺度呢？而且我哋收工都冇人喺度㗎～你去搵寵物酒店啦，有啲二百幾蚊一日㗎咋」
佢大驚：「一個星期咪成千幾銀？」
我冇出聲。
佢：「我交租都係咁上下咋」
我：「如果你住公屋嘅，長遠落去你都要諗點安置隻狗仔㗎啦～」
佢：「隻狗我新買㗎，我未玩厭㗎！」
玩你個頭！明知自己住公屋仲要買狗！
我：「小姐，動物唔係拎嚟玩嘅～你自己住緊公屋，明知唔俾養狗就唔好買啦，你而家玩緊你自己咋」
佢：「死八婆！你唔好開診所啦！我住公屋點解唔養得狗呀？我擺低佢喺度幾日你仲要煩過我老母！你唔好開喺我樓下呀嘛！」
佢講完就離開了。

你同房署講啦～條例又唔係我定…