【珍寶豬欄】我唔駛要咁多藥，我要一粒得㗎啦

佢行埋嚟登記處：「你可唔可以解釋吓我而家係咩情況呀？去到邊個stage？」
從你個外表睇，你而家應該係中年階段，正準備步入老年…
我：「請問有咩事呀小姐？」
佢掉包藥上枱：「我噚日先嚟睇過，到而家一啲咳都冇止到，仲係咁咳」

係？你講咗咁多句，都冇咳過一聲啊，肯定係你見到我就藥都唔駛食～嚟，姐姐俾張相你返去日日對住呀。

我望望啲藥：「你...食咗一次藥咋？」

佢：「我食過一次覺得冇咩效，都仲係咳嘅！」
我：「醫生開咗三日藥俾你，你食一次唔會即刻見效啦～」
佢：「你開三日藥唔通我就要食足三日咩？」
咁快好返嘅，嗰啲係仙丹啊姑姑！
我：「你不如食埋啲藥先～如果真係都仲未好先再過嚟啦」
佢：「我而家去到邊個stage呀？你唔識答唔緊要，搵個識答嘅嚟同我講！你唔識答都同我換藥呀！啲藥唔得先冇效呀！」
我：「…你食得一次，你份藥醫生都跟足你嘅病情嚟開～氣管藥有，咳藥有，收鼻水都有～你食埋先啦」
佢：「我唔駛要咁多藥，我要一粒得㗎啦，你照收我咁多日錢我ok㗎，錢我真係唔care。」
如果我有『含笑半步釘』，我一定讓俾你…
我：「我嘗試吓幫你問醫生有冇得換藥啦，都十有九係冇得換㗎啦，因為你真係食得嗰一次…」

問完醫生，醫生加多粒維他命俾佢…
我：「咁…醫生加咗藥俾你～你再試吓有冇好啲啦」
幾日後，小姐再嚟，佢拎住當日加嘅維他命藥袋嚟：「呢個好呀！我淨係食呢隻都已經冇咳啦！我就係要呢隻！我淨係嚟配呢隻擺定喺度得啦！」

維他命好嘢…