【珍寶豬欄】阿人哋老公，識做啦！

佢行埋嚟同我講：「姑娘，我想配藥」
我：「好呀，你俾俾個覆診卡號碼我先～我睇睇排版先呀」
佢拎出覆診卡，我睇完排版問：「你係想配返小朋友上次啲藥，全份係咪？」
佢：「係呀，可唔可以配多兩日，即係前後四日呀？」
我：「我問問醫生先，轉頭覆你」
佢：「我配多兩日嚟看門口，廢事郁啲就走上走落」
我：「明白呀～我都問咗醫生先，配到嘅我就直接同你配四日藥啦」
等拎藥期間，太太電話響了，佢傾咗幾句就好快收線。
隔咗唔夠兩分鐘，佢電話又再響，講講吓佢開始大聲…
『我落嚟配藥俾個仔咋！我去得邊呀？你以為我成日喺屋企真係好得閒呀？你都冇理過我感受！我湊住兩個已經好攰啦！你仲打嚟同我講啲咁嘅嘢？』

講完之後…佢一嘢飛咗部電話落地，之後喺度喊。
我拎住盒紙巾行出去，靜靜咁放低盒紙巾喺佢身邊，再執起佢部電話…
佢同我講：「唔駛執㗎啦！冇㗎啦！」
我行埋去：「冇事冇事，爆咗MON貼啫應該…」
佢：「啲男人點解永遠覺得我哋湊仔係行行企企？」
我拍拍佢肩…
佢繼續講：「好似佢返工搵錢就最辛苦咁，佢大曬嘅。佢放工返嚟就咩都唔做，淨係喺度睇電視玩電話。我喺屋企做咗全日，我都冇休息過呀！阿仔病唔舒服，我落嚟配個藥，奶奶就即刻打俾我老公話我冇睇住個仔！佢阿媽講句咁嘅嘢，佢就信到十足十，即刻打嚟話我！」
我冇出聲，繼續聽佢講…
佢：「我生仔唔辛苦嘅？我餵奶唔辛苦呀？佢哋病又係我做，佢哋唔病又係我做！我其實有冇老公嘅啫？結婚前話俾幸福我，幸福呢？我而家幸福咩？佢有冇諗過係佢將我嘅幸福破壞咗呀？」
我：「嗯～我都知你好辛苦，明嘅」
佢：「我講兩句呻幾句就話我抗壓力低，我想要佢聽吓我講嘢咋…」
我：「或者今日你同我講吓囉？」
佢：「你又唔係我老公！我同你講有咩用？我啲藥得未呀？我趕住返去㗎！」

噢，對唔住呀～阿人哋老公，識做啦！太太們需要嘅，其實係你哋嘅支持，你哋嘅信任體諒包容同聆聽。呢啲嘢，係我哋外人俾唔到嘅。