【珍寶豬欄】醫生都要交租

睇完之後，醫生：「好啦我開啲藥俾你，你可以出去等攞藥，記得多啲休息。」
小姐唔多願走咁，繼續坐喺度。
跟症嘅我：「小姐，得㗎啦～可以出去㗎啦」
佢問：「醫生呀？」
醫生：「嗯？」
佢：「我平時有捐開錢㗎」
醫生同我R晒頭。
佢：「你會唔會想俾我留返啲錢去幫其他人呀？」
想免費定減價啊？
佢：「我可以上網話俾人知你有份捐㗎」
哇，好巴閉喎。
醫生望望我。做咩又係望我呀？你唔識SAY NO咩～我係你信任嘅人呀？

我：「小姐，我哋收費方面係定咗嘅，個個病人都一樣㗎」
佢怒瞪我：「我問你咩？」
醫生又望我。喂～唔好啦～你自己答啦好冇呀。
我：「小姐你捐錢幫人呢個行為係好嘅～收費方面呢，我哋冇減嘅空間㗎啦，真係唔好意思呀」
小姐直接無視我，佢望住醫生：「醫生呀，我都有啲人留意㗎，我上網講你有份捐你有份幫人，你都有彩拎㗎，我可以出你全名㗎喎，我應承你呀～」
請問有咩彩拎？
醫生又望我。我真係想插盲你對眼。

我忍唔住直接啲：「小姐，如果醫生要捐錢幫人嘅，佢會自己直接捐，唔需要透過第三者去話俾人知佢有份捐。要幫就會幫，唔係要人睇到先去幫，你明唔明呀？」
佢終於望住我：「做咩喎…咁WINWIN呀嘛…」

我：「醫生都要交租，你唔俾診金藥費嘅，又點會係WINWIN呀？」

小姐離開後，醫生問我：「你係咪肯定佢頭先冇鏡頭冇錄音呀？」

我：「唔知喎～做咩呀？」
醫生：「如果佢有鏡頭有錄音嘅，我哋可能會俾佢擺上網啦…」

噢，咁唯有我自己認咗先啦。