【珍寶豬欄】我個細佬應該點擺呀？

我：「你好，乜乜診所」

佢：「姑娘呀？我頭先嚟過㗎」

我：「係～請問咩事呢」

佢：「我頭先好似有啲嘢唔記得問醫生呀」

我：「你可以講我知你想問啲咩，我等醫生睇完症幫你問完再覆你呀～」

佢：「有啲私人嘢㗎喎」

我：「咁呀...一係你過嚟見醫生問醫生啊」

佢：「會唔會收多次診金㗎？」

我：「唔會啦，你今日嚟過㗎嘛，你今日內問醫生都可以啊」

佢：「咁呀.....我晏啲過嚟呀」

收線後冇耐，電話又響起。

我：「你好，乜乜診所」

佢：「姑娘呀，我都係嚟唔到呀，你可唔可以而家幫我問呀？」

我：「醫生睇緊症啊，要等佢睇完先可以問到啊」

佢：「但係我都幾急吓，都等唔到咁耐喎」

我：「你想問啲咩呀？」

佢：「你睇吓我排版呀」

我：「你俾你覆診卡號碼我先呀～」

佢：「12321，你睇吓就知咩事㗎啦，就知我想問咩㗎啦」

我睇完之後，都係估唔到佢想問咩....

我：「唔好意思啊先生，你係想問啲藥點食呀？」

佢：「唔係呀，我識睇字，我想問關於我個病...嘅處理方式」

我：「你...尿道炎啊，食藥囉？準時食藥啦？多飲水啦？」

佢：「唔係呢啲呀，呢啲我知呀，我想問....點去廁所呀」

做咩呀？食咗藥會突然唔記得點除褲點去廁所㗎咩？

我：「就咁去囉？你去唔到廁所咩？」

佢：「唔係呀，我想知嘅係...我而家想辦大事。」

我：「嗯？」

佢：「我個細佬應該點擺呀？而家佢有事呀嘛，怕唔怕佢掂到啲廁所水或者其他嘢咁呀？」

......或者晾起佢？