【珍寶豬欄】比黑更黑的咳水

到出藥時，佢一見到枝咳水就問我：「你呢枝咩嚟㗎？」
我：「咳水啊～」
佢：「我唔係要呢隻喎」
我：「你...係想要邊隻？」
佢：「黑色嗰隻呀，我頭先有同醫生講㗎喎」

我望住眼前枝咳水，撞鬼囉！係黑色嚟㗎喎！

我：「呢枝...咪黑色囉？」

佢揚一揚自己件上衣：「黑色呀，我呢啲先叫黑色呀！唔係黑色嘅我食唔好㗎」
但係我哋全診所嘅咳水最黑係佢啦喎～

我入去同醫生講：「醫生～佢話想要枝比呢枝更黑嘅咳水」
醫生擘大個口得個窿望住我，做咩呀～肚餓呀？
醫生：「呢枝咪黑色囉？」
我：「係呢～係黑色呢～我以為自己色盲呀，嚇得我呀，好在你都係」
醫生：「咁佢想點呀？」
我：「佢話要黑色咋」
醫生：「你自己拆掂佢啦」
我：「哦」

我行返出去同女士講：「唔好意思啊小姐，醫生話得呢隻黑色咳水咋」
佢拎起枝咳水放在燈光底下凝視咗一陣：「透光㗎喎」

唔透光嘅，你不如去買個墨硯返嚟自己磨呀？包杰呀！

我：「正常嘅，佢咳水嚟㗎嘛～」

佢：「我平時飲開嘅都唔會係咁，你哋係咪自己溝過水落去呀？」
我：「冇呀，原裝藥廠一卡卡藥水咁倒出嚟㗎」
佢好質疑：「如果你呢枝個藥份量唔足，你知唔知已經係一個虛假商品說明？」
你哋點解咁喜歡同我講法例...
我：「我哋自己冇溝過任何嘢落去嘅」
佢：「如果你話呢枝係黑，咁我平時飲嘅係咩？」
我唔知，不過我覺得你好勁，咁都飲得落口。

我：「唔好意思啊，我哋真係得呢隻黑，其他嘅對你嚟講可能會仲淺色....」
佢：「咁我唔睇啦，當我冇嚟過啦」

佢好隨心所欲咁離開咗，找尋佢嘅比黑更黑的墨汁咳水。