【珍寶豬欄】你處理咗我個寶貝？

佢行到埋嚟登記處問我：「你聽唔到我入嚟咩？」
你又唔係大笨象。
我：「請問有乜幫到你？」
佢：「見人入嚟都唔嗌聲⋯我要驗孕呀，係咪即刻知？」
歡迎光臨！
我：「係呀，我幫你登記咗先呀，麻煩你身分證呀」
登記後，小姐入到醫生房。

醫生問：「經期遲咗幾耐未嚟呢？」
佢：「個幾鐘。」
⋯⋯佢好認真的。即使醫生同佢解釋遲咗個幾鐘驗未必準，佢都堅持要驗。
驗完之後，醫生同佢講：「小姐，驗到係冇嘅」
佢望望枝驗孕棒問：「你頭先話要幾耐先會準？」
醫生：「一星期左右」
佢：「咁我一星期後再嚟啦唔該醫生」
岀到去，小姐直接離開診所，係呀！冇俾錢呀！
之後我打俾佢：「喂？小姐？頭先你未俾診金㗎～麻煩你返嚟俾返錢呀～」
佢：「醫生叫我一星期後再嚟㗎，我到時再俾啦！」
嘟。佢收咗我線。

我哋唯有抱住人性本善嘅希望，相信佢一星期後會返嚟⋯

等呀等。

佢又嚟：「你聽唔到我入嚟咩？」
我：「歡迎你，今日都係嚟驗孕呀嘛？你去洗手間留小便俾我呀」
佢：「點解又要留呀？」
我：「你今日驗孕呀嘛？唔係咩？」
佢：「係呀，上次咪留咗囉？」
我：「上次？上星期啦喎？」
佢：「醫生嗌我等一星期㗎嘛」
我：「吓？上次嗰啲即日處理咗啦喎⋯」
佢碌大對眼哄到好埋我度，嗯呀，有眼屎：「你處理咗我個寶貝在生嘅痕跡？你掉咗呀？你有冇搞錯呀！你咁對我個寶貝？」
你玩咁大呀⋯
我：「小姐，嗰枝驗孕棒㗎咋，唔係bb嚟⋯你冷靜啲先，上次驗到係冇㗎嘛，所以醫生先叫你嚟驗多次⋯」
佢：「我咪過咗成個禮拜先嚟囉！上次嗰枝咪過咗成個禮拜囉！我個寶貝咪已經成個禮拜大囉！」

你當我呢度係『寶貝』診所呀？