【珍寶豬欄】咪玩啲單張呀

個仔就喺坐吓地下磨屎忽遊遍成個候診大堂。

媽媽眼尾望到囝仔咁就開聲講：「企返起身啦，地下污糟呀」

囝仔繼續磨，繼續自己玩自己開心，媽媽：「嗱，我數三聲，你好起身啦吓！」

媽媽：「一，二，三！」

三完好耐，媽媽電話不離手，囝仔繼續磨。

囝仔應該磨到屎忽有啲慶，自己企起身行埋嚟登記處，望住啲單張⋯

嗱！嗱！嗱！o靚仔！咪玩啲單張呀！我知你想點㗎！

爸爸眼不離開手機：「過嚟坐低呀」

囝仔伸手到單張架，一拉一扯，成疊單張散落地上。

我自問聲線尚算溫柔：「小朋友，唔好玩啦，乖乖哋坐低等啊～」

就係因為呢句，媽媽突然好精靈捨棄手機咁爆發了：「你做乜鬧我個仔呀？」

冤枉呀大人，我咁都叫鬧人嘅話，以我副尊容唔駛出聲都算係講緊粗口啦？

我：「我冇鬧啊，我嗌佢坐低等啫～」

媽媽：「你有乜資格話我個仔呀？佢做錯乜呀？啲單張好貴呀？」

我：「唔係貴唔貴嘅問題⋯」

媽媽：「我都未投訴你啲嘢有機會整到我個仔啦！你有責任諗吓啲嘢會唔會整親人㗎嘛！」

我：「點整親呀⋯」

媽媽執起一張單張，喺我面前揮動：「會界親人㗎！」

挑！會唔會界親你個仔我就唔知啦！不過肯定界唔入你，你面皮厚到成塊漢堡包皮咁！

我：「所以咪唔好周圍掂周圍搞啲嘢，乖乖哋坐喺度咪好囉」

媽媽不停撫摸單張：「我係要掂呀！咁點呀？」

冇⋯冇乜點嘅，你係要搞，我都唔會阻止你嘅，你有呢個癖好我都控制唔到㗎。

不過你望吓⋯

你老公同你個仔用好奇異嘅眼神望住你啦。