【珍寶豬欄】說太多了！媽媽

圖片:珍寶豬

我：「你好，乜乜診所」

對方係一位女士：「你哋睇唔睇小朋友㗎？」

我：「睇呀，可以直接嚟登記啊」

女士：「睇唔睇『咕咕』？」

「咕咕」－我冇理解錯的話，應該係指男性生殖器官。

我：「嚟到俾醫生睇咗先啦，如果有需要可以轉介去專科睇～」

女士：「佢『咕咕』好似偏細size，其實有冇可能係正常？」

我：「吓⋯呢個我答你唔到，你都係帶小朋友嚟俾醫生睇吓先啦～」

女士：「你哋係有得睇，我先過嚟呀！嚟到又話冇得睇嘅，嘥我時間又嘥錢㗎咋～」

我：「始終我唔知小朋友情況，我冇得確實答你，我唔係醫生冇得評估小朋友情況，最穩陣梗係俾醫生睇啦～」

女士：「我都講咗佢係『咕咕』細，好細呀！」

細同大之間係有幾多距離，幾多吋幾多厘米，大同細呢啲嘢咁主觀，點同「咕咕」定位好啊？

我：「⋯咁我唔知有幾細嘛⋯」

女士：「你等等！」

乜呀？你想點呀？你做乜呀？等乜嘢呀？喂？返嚟呀女士，你冷靜啲呀！

我：「喂？喂？喂？」

女士：「你係咪要睇咗先答到我呀？」

我⋯冇特別癖好啊～仲要小朋友⋯啋！

我：「唔係唔係～我唔係要睇啊～呢啲唔輪到我睇㗎，係醫生睇㗎～」

女士：「你去問吓醫生點先叫係細啦，我好擔心㗎你明唔明呀？」

我：「醫生唔會喺電話診症嘅，你擔心嘅同小朋友嚟睇咗先啦，喺電話度一直講都冇幫助啊，始終我唔係醫生嘛，睇完有乜問題都可以即時跟進，好好多嘅～」

女士：「我唔想我個仔好似我老公咁呀！呢啲係咪都有遺傳㗎？男仔要見人㗎

！」

女士講完之後，我哋都沈默了。「嘟⋯」，佢收線了。大概知道自己洩漏咗重要嘅國家機密。