港鐵公布上半年業績盈利逾158億　半年利潤倍增　田北辰撰文分析港鐵收入大升來源及前景

港鐵（0066）公布截至6月底止上半年度業績，上半年盈利逾158.7億元，按年升逾一倍。中期息維持每股0.42元。期內，經常業務利潤升1.3%至34.3億元；物業發展利潤升1.2倍至122.3億元，主要受惠於大圍站及「港島南岸」第五期項目。

本年度票價維持不變　提供恆常票價優惠

根據港鐵公布的業績公告提及，期內所有鐵路和巴士服務的總乘客量為9.754億人次，按年上升1.2%。而2026/2027 年度的票價維持不變，該安排規定經計算所得的票價調整幅度（+2.85%），不得高於相應的家庭住戶每月入息中位數的按年變動（零）。本年度未實施的票價調整幅度+2.85%，將延後至隨後兩年，即分別在 2027/2028 年度（+1.43%）及 2028/2029 年度（+1.42%）調整票價時實施。

港鐵亦指今年首六個月，港鐵繼續為長者、小童、合資格學生、殘疾人士等乘客提供恆常票價優惠，亦為出行乘客提供不同的車費推廣優惠，包括「都會票」及綠色專綫小巴 0.5 港元轉乘優惠，而「全月通」及「早晨折扣優惠」亦延長一年。

另外，田北辰在社交平台撰文表示，最關注反是港鐵「經常性利潤」，微升1.3%至34.3億元，亦分析港鐵業務性質「地產公司」或是「鐵路公司」，點出了現時港鐵業務的現象，並分享自己對港鐵將來及前景的看法。

田北辰「港鐵收入大升詳細睇睇來源同前景」全文

//噚日港鐵半年業績出咗啦，總利潤150幾億，升咗成倍幾，全世界都嘩然。如果每半年賺150幾億，一年咪賺300億？同以前成日都係幾十、一百億相比，差距真係好遠。到底依家變咗啲咩，原因係咩呢？我做咗個詳細分析，亦都了解過，有啲睇法同大家分享下。

基本上睇港鐵嘅業績，最緊要係撇開「非經常性」利潤，即係買賣物業。買賣物業利潤多咗1.2倍，所以先有一個咁大嘅利潤。但買賣物業唔係經常有，有起有落，所以我最關注嘅反而係佢嘅「經常性利潤」。睇到佢經常性收入跌咗4%，我成個人彈起，因為經常收入跌嘅話咪會出事？係唔係少咗人搭？原來主要係因為有幾間海外營運到期。呢啲營運有收入但無利潤，即係白做。依家唔做，收入少咗，但利潤反而無少到。最後經常性利潤微升咗一點幾，去到三十幾億。

咁我就好有興趣啦，到底港鐵係一間咩公司？咁多年嚟口同鼻拗，個個都拗唔清楚，有人覺得港鐵係地產公司，港鐵就話自己係鐵路公司，到底係咩呢？真係非驢非馬。我睇返佢經常性利潤嗰三十幾億，其實非常健康。原來嗰三十幾億入面，有十幾億係來自商場（例如青衣城、圍方、德福等等）。但最驚訝嘅係，鐵路站入面原來有成千幾間舖頭。鐵路站舖頭嘅租金，竟然又可以幫佢賺十幾億。另外仲有啲海外營運、八達通等附加業務增長。呢啲經常性利潤有增長，就係我睇得最緊要嘅地方。相對頭先講嘅物業收入，係有升有跌。

但原來最出奇嘅係，將佢鐵路收咁多車費（每年二百幾億），減返龐大嘅鐵路網絡維修、人工、燈油火蠟等成本，加加埋埋竟然係打和。咁就出現一個其他地方都會羨慕嘅現象，佢核心業務係鐵路，但核心業務反而無錢賺，全靠核心業務帶嚟嘅附加項目去賺大錢。又帶出頭先個問題，究竟係鐵路公司靠附加業務賺錢，定係地產公司附帶做鐵路呢？佢自己話係鐵路公司，但好多財務分析話佢係地產。我覺得呢個模式好特別，但主業仍然係鐵路，因為如果呢樣做唔好，冇人搭，其他所有收入都會大跌。至於個物業買賣，其實就係因為政府從來冇出過錢去起鐵路，就撥地作為鐵路成本，變成盈餘。

咁所以如果我依家睇港鐵嘅將來，佢經常性嘅利潤就係頭先講嗰啲，同佢買賣物業嗰啲冇關，純粹係佢營運鐵路所得嚟嗰啲嘢有錢賺，呢個係穩定收入。另外我好睇好佢將來嗰個非經常性嘅地產。依家全部啲新鐵路，例如北環線、港深西部鐵路，政府就唔會出錢，全部撥地。咁今時今日啲地就唔係好值錢，港鐵就一定開有利條件，總樓面面積有幾大就要幾大，咁政府都冇佢辦法，因為政府係要盡快起鐵路去配合政策。我覺得咁就差不多係任港鐵叫價，如果港鐵話要一千萬呎，但政府畀唔到，咁港鐵話你畀唔到我唔起，咁政府點呢？政府又冇可能逼佢，始終係上市公司。所以睇得出，政府一路拖唔起條鐵路，如果佢覺得條鐵路一定要起，其實佔上風嘅係港鐵。

所以長遠港鐵就拎住好多地，而香港嘅地價，將來一定唔會好似今日咁，一定慢慢上升。同埋，又有咁多新嘅鐵路樓盤嚟緊，非經常性收入將會非常可觀。所以一間咁樣嘅公司，我覺得佢舉債，真係唔係一件好難嘅事。//