【長腿爸爸】網絡惡意批評　真係會害慘好老師

朋友有一位part-time老師，係一個好有愛心又有熱誠嘅後生女，佢同呢位老師都合作咗一排，一直合作愉快。直到最近，一位家長喺下課後就搵Playgroup主任，投訴呢位part-time老師，內容大致上係不滿佢個小朋友坐喺比較側面嘅位置，咁主任都有同佢解釋，啲位係俾大家隨意坐，唔係老師安排，以為咁就可以安撫佢。

Part-time老師都有主動搵主任傾番件事，原來喺課堂上，老師已經感覺到嗰位家長好不滿，成日用唔友善嘅眼光怒目相向，仲嘴藐藐咁，見到個家長咁樣，老師一直好不安，佢要好努力先可以完成堂課。當主任講出家長只係不滿個坐位，個老師立即O咗嘴。當時主任仲笑笑口講：「不嬲啲小朋友都鍾意上你堂，有時啲家長太緊張同太敏感，你都理唔到咁多。」

老師第一次俾人投訴，都有少少唔開心，因為自問對啲小朋友都好好，所以都花咗啲時間先平伏到心情。

點知隔咗一日，有朋友send咗個某大親子平台討論區嘅cap圖過嚟，個post開名指責part-time老師，是一大長篇大論嘅文章，指責佢「好少望佢個坐喺側面嘅小朋友，好無愛心、唔專業、好冷漠」，然後下面的留言群起批評老師。part-time老師邊睇邊喊，明明啲小朋友喺Playgroup玩得好開心，佢亦都有盡量照顧每一個小朋友，唔明點解呢個家長要講啲唔真實嘅言論，而班唔知頭唔知路嘅網民亦不分青紅皂白就去公審佢。

喊到眼都腫埋，老師返去Playgroup向負責人傾訴，負責人決定向嗰個親子平台提出投訴，點知親子平台回覆：「本平台沒有立場，不會隨意刪除任何帖文。」

負責人問過一啲朋友，有朋友提議開多個account去還擊，不過負責人與老師都唔同意，一來太嘥精力，二來亦未必有用。後來，負責人再同嗰個親子平台溝通，對方開出另一個建議，講到呢度賣個關子先，你即管估下係咩驚世方案？

件事搞到個老師覺得非常沮喪，連上堂都有啲驚，開始猶疑應唔應該繼續做落去，但係如果真係放棄嘅話，就好似向呢啲無理由無根據嘅批評屈服，真係好唔甘心。如果繼續做落去，就要有心理準備面對更多怪獸家長。負責人都曾經同佢分享唔少無理取鬧嘅家長投訴case，真係好令人激氣同無奈。

Billy Cool同呢個開Playgroup嘅朋友傾咗好耐偈，感覺佢哋營運都唔簡單，除咗要保持課堂質素同師資，又要確保收生人數，照顧小朋友之餘，仲要照顧埋家長。

「而家越嚟越多人嚟Playgroup，就越嚟越多機會遇到怪獸家長，就好似嗰個家長咁，內心一定係非常自卑，可能老師真係望少咗一眼，佢就玻璃心，立即就要投訴，又誇大件事去批評，等自己可以喺網上得到同情、認同，要靠搵陌生人圍盧取暖，其實好悲哀。有時間不如多啲陪伴小朋友成長，咩都走去投訴，咁樣會帶俾小朋友負面情緒。至於我個part-time老師真係一個好純品、好率直嘅女仔，佢係真心有heart做老師，對住啲天真嘅小朋友梗係無問題，但唔係個個家長都正常，遇到變態家長，一個初出茅廬嘅女仔點可能保護到自己？」

至於嗰個親子平台提議嘅驚世方安，原來就係：出律師信！咁搞一搞就要幾千蚊，之後又唔知個客會唔會反擊，搞多兩搞可能會打官司，你以為開Playgroup好好賺咩？耐唔耐整單家長上網唱衰你又要駛錢去打，唔駛做啦。

聽完成件事，Billy Cool就覺得都無咩好做，唯有俾時間去證明事實，如果Part-time老師真係教得好，自然會有支持佢嘅家長，同埋而家都興 fact check，理智啲嘅家長都唔會亂信網上流言，一個半個惡意批評，咪當另類宣傳囉。

作者:
長腿爸爸Billy Cool
人稱工廈界Cool魔，十幾年前買入第一個工廈單位，賺到第一桶金，從此改變對財富嘅睇法：有生意當然要繼續做，但想賺大錢就要有準確嘅投資角度！