【坐月的迷思-沖涼篇】真係成個月唔沖得涼?

坐月真係唔可以沖涼？

無論生唔生BB都好，都一定聽過坐月唔沖得涼呢個說法，但到底係未一定要跟從呢？沖同唔沖有咩影響？相信係好多產婦嘅迷思。

忍左幾多日先沖涼？

其實由陣痛到起產房出力咁生阿B嘅時候，已經爆到成身大汗，成件醫院袍都濕哂，不過由產房出黎個刻起已經係開始左坐月既日子，唔掂得生水，唔沖得涼，唔洗得頭，目的都係為咗避免坐月時冷親，產後病咗係會長手尾 。
平時一日唔沖涼洗頭都難忍，依家比平時更唔乾淨，真係好唔舒服，而且身體同頭皮既分泌係愈來愈多，積累得多的確好唔衛生，最怕有菌，唔係好適合親近照顧BB。
於是捱左兩星期左右，我決定沖一沖涼。

用咩沖涼先適合？點樣唔入風呢？

當然啦，起無沖涼既日子，我係有用藥材水以毛巾抺身嘅，所以沖涼既話，我都選擇左用藥材水沖身及洗頭。同時，我喺BB展買定有老薑成份既沐浴露及洗髮水，務求唔好太入風，善用老薑的驅風功能保護自己。為免著涼，我沖涼時每一步都小心翼翼，先沖洗上身抹乾，再洗其他部位，穿回衣服後先洗頭，吹乾頭髮先出浴室，咁就可以避免因沖涼而著涼啦。

中醫與西醫的意見

產後我問過中醫與西醫「幾時可以沖涼啊？」
我的婦產科私家醫生就話可以沖架喇其實。中醫師就表示還是以薑水抹身吧，始終普通水沖涼會易入風。於是忍唔住想沖涼嘅我就以藥材水沖身及洗頭，熱熱地，成個精神番哂，湊B都舒服啲。

大家產後又係幾時先沖涼呢？雖然好似好少事，但對於身子與精神都弱咗嘅產婦來說，任何事都好重要，唔病得，如果唔係點照顧BB呢？

作者：Teresa mama

一年內結婚生B完成人生大project，但驚覺才是人生新開始的在職媽媽