【仔仔扭計唔返學】聰明泰媽一場「震撼教育」搞掂

泰國呢名聰明嘅泰媽，日前就係Facebook度分享呢一場有趣嘅教育！呢位泰媽話當日，仔仔晨早流流就扭哂計唔願返學，點勸都無用，最後泰媽無奈之下，把心一劃！為仔仔請咗一日假，然後帶咗佢去執垃圾。

據悉，當日兩人行咗約3公里路，一路上仔仔一頭大汗，不停話好累、好想返屋企，泰媽就教佢，如果不想上學就必須要出去賺錢，而執膠樽正係佢目前唯一可以賺錢嘅方式。幾經辛苦，仔仔執滿一袋膠樽，賣得2泰銖（約港幣5毫子），佢不停問媽媽：「我哋可唔可以坐巴士返屋企？」泰媽就話：「坐巴士要10泰銖（約港幣2元多），你有幾錢？」

仔仔之後又想食雪糕，泰媽又話：「雪糕要5 泰銖（約港幣1元多）喎。」

仔仔累到一頭大汗，坐係路邊，不停話好累，好熱，仲同媽媽話想返學、想返屋企。

 

事件上傳於網絡後，好多網民都大讚呢名媽媽嘅教育方式好聰明，等小朋友親身體驗到賺錢嘅辛苦之餘，亦令佢哋可以明白讀書嘅意義，好多媽媽仲話要仿效添！

圖片及資料來源：Facebook Page「Nuttanitcha Chotsirimeteekul」