【玩勻免費遊戲室】「海洋世界」天暉路兒童遊戲室

天暉路體育館鄰近天恩邨和天富苑，同天瑞體育館相距只是十多分鐘腳程(當然大家也可以乘坐公共交通工具前往)，而從天水圍西鐵站乘搭巴士或輕鐵，最快約15分鐘就可到達。

相比起之前介紹同樣位於天水圍的兩個遊戲室，天暉路遊戲室空間大好多，比屏山大足足5倍﹗所以玩樂設施都有更多種類同多元化，絕對令小朋友樂而忘返，50分鐘一節係完全唔夠喉！不過，就係因為呢個遊戲室係全天水圍區最大，所以都有好多小朋友嚟玩，如果要入場，起碼要預早30至45分鐘排隊攞籌，如果唔係40張籌眨下眼就會派晒㗎喇！

就喺呢到排隊喇，條隊多數都會排到入咗防煙門後面㗎！

遊戲室係以「海洋世界」做主題，所以會見到成個場地背景顏色都係藍色，令人感覺好舒服。

遊戲室好大，遊戲設施都好多，小朋友喺呢到點樣跑都得，重有好大空間畀家長一齊陪佢地玩。

想睇清楚有幾大，可以轉吓呢張360全景相片。

天暉路兒童遊戲室 

主題：海洋世界

面積：315平方米，屬全港最大室內兒童遊戲室之一

開放時間：早上8時30分至晚上9時20分（不包括下午1時20分至2時30分），每節時間50分鐘

賣點：

1. 面積偌大，確保小朋友有廣闊空間跑動遊玩

2. 親子互動空間充足，同享親子樂

3. 非常鄰近同區其他兒童遊戲室，小朋友可以玩足全日！