【皇帝唔急太監急】英國BB車內受困笑騎騎

日前，英國就有一位2歲大嘅男仔Brandon Emery，一個唔小心就鎖咗自己喺私家車裡面，要等消防員叔叔嚟開門救佢。雖然嚇死媽媽，但呢位小朋友就一啲都未驚過，仲主動爬去司機位望住消防員叔叔騎騎咁笑，搞到班叔叔心都軟埋呀！

事源當日，媽媽Kirsty Green就帶住仔仔Brandon啱啱係超市購物完準備回家。當Kirsty準備將啲貨物放落車尾箱時，見到Brandon不停想從手推車爬落嚟，擔心仔仔會跌親嘅Kirsty，忙亂間就將佢抱入汽車後座。誰不知一放低，Brandon就誤觸鎖車制，將自己反鎖咗係車內，而Kirsty嘅車鑰匙又漏埋係車尾箱內…媽媽睇住被困車內嘅仔仔，又擔心又緊張，只好即刻向消防求助。消防員到場後一邊逗Brandon開心，一邊打爛車門玻璃，希望唔好嚇親小朋友，點知Brandon一啲都唔驚，仲爬埋去司機位，兩隻手搭住呔盤，望住消防員係咁笑，真係好得意！

 

最後Brandon被順利救出，媽媽Kirsty終於可以鬆口氣啦！今次雖然好彩無事，但意外呢啲嘢真係好難預料，做家長嘅真係要小心睇實小朋友先好啦！

圖片來源：網絡