【有機菜即摘即食】11萬呎有機農莊玩足大半日

直至剛過去的星期日見氣溫回暖，所以就去了近期非常熱門的曉峰大江埔農莊，一心希望去摘有機士多啤梨！

位於錦田的曉峰大江埔農莊於今年1月才正式開始營業，除了採摘活動外，另有租地耕作、燒烤區、狗隻專區、露營區及兒童區。是近期熱門的親子好去處！

誰不知山長水遠入到去，發現士多啤梨原來已近水尾，農場種植的士多啤梨雖多，但都被剪得7788，所餘無幾。

雖然話所餘無幾，但真係好想摘下，咁10粒8粒都仲搵到嚟畀小朋友剪下嘅！

士多啤梨的採摘期已到尾聲so sad！

不過我無失望，因為除咗士多啤梨之外，此處還有其他有機蔬菜可以摘，例如車厘茄、蕃茄、紅菜頭、蘿蔔、椰菜等，全部有機種植！而且地方超大，可以BBQ、打邊爐，即煮即食有機菜！地方又超大，小朋友可以周圍跑跑跳跳踩單車！

BBQ專區設有美式燒烤爐

BBQ區，2-8人一張檯。

除了任食肉類燒烤外，另可選擇任食有機蔬菜火鍋，好健康。

有機車厘茄有多個品種選擇，有紅色有橙色同黃色種，即摘即食好甜架！

超正有機大蕃茄

呢3隻咁靚嘅蓄茄影完相之後，就畀我摘咗，嘩卡卡！

此處的好處是一年四季都會種植因應時令的有機蔬菜，過多一排將會有粟米、苦瓜等有機蔬菜，不過暫時未有菜心。負責人稱：「因為有機種植關係，不會使用農藥，種菜心比較困難。」

除咗常見嘅有機菜之外，仲有一啲特別品種有機蔬菜！

呢個好似日本漫畫One Piece中嘅「惡魔果實」、又似伊藤潤二筆下嘅物體，其實係特別品種有機椰菜！實在太特別，我都係睇人摘咋我！

帶小朋友去如果摘唔到士多啤梨，可以去摘車厘茄，高度啱啱好。

仲可以去蘿蔔田度掘蘿蔔，小朋友最鍾意！

大大個有機紅菜頭都可以自己成個掘出來，好好玩架！

摘完就拎去磅重計錢，蔬菜均一價$60/kg

想即刻食？無問題，但都要洗乾淨先架！

洗乾淨就可以即刻食喇！

 蕃茄同蘿蔔就可以加入去火鍋畀小朋友食啦！

其他蔬菜就可以帶走返屋企加餸！

11萬呎的農莊可以借用單車仔、滑板車讓小朋友任玩、又可以打鞦韆，更有狗仔專區、兒童遊樂區，絕對夠玩一日！

超大地方，單車、滑板車都可以隨便踩。

坐下休息下曬下太陽又得！

小朋友玩下足球機又得！

即食士多啤梨、玩下親子小遊戲都得！

好多一家大細都玩得好開心架！

狗狗專區可以畀大家同毛孩開Party！

現場仲見到有好幾架露營車，不過似乎尚未投入服務。問過負責人，她稱：「我哋呢度都係新搬過嚟，舊址農場無呢度咁大。呢度地方大好多，所以公司希望加多啲唔同嘅設施，露營車係其中一項。不過因為露營車仲接駁緊水、電同排污系統，所以尚未可以投入服務。」

日本製鍊奶$30一支 

唔記得帶吹泡泡、玩具畀小朋友玩？唔緊要，呢度都有得賣！

如果嫌任食BBQ同火鍋的選擇唔夠喉，可以再額外加料。

BBQ任食與收費食品選擇。

農莊提供兩個plan供會員選擇：

Plan 1

3小時任食燒烤 (每爐限2-6人用）

成人 $188/位，小童 (1 - 1.4米高) $128/位，1米以下幼童免費，狗隻 $40/隻

費用包括：入場費、每位成人有機蔬菜一包及飲品一罐

任食燒烤食物內容包括牛扒，豬扒，雞翼，雜丸，方包，香腸等基本燒烤食物

Plan 2

3小時任食有機蔬菜火鍋

成人 $188/位，小童 (1 - 1.4米高) $128/位，1米以下幼童免費，狗隻 $40/隻

費用包括：入場費、任食有機蔬菜、每兩位成人一份雜丸及肥牛以及每位飲品一罐

以上價格不包括採摘農作物，額外採摘農作物均一價：$60/kg

想去玩的一家大小，要留意農莊屬私人地方，只招待會員，不接受walk-in，想前往遊玩的朋友可以先登記成為曉峰會員，入場前必須提早預約。會員可免費停泊停車場。

當日即場Like Facebook Page及登記做會員會獲贈有機圓形脆肉瓜一個，好得意又好好食架！

馬穎當日又摘菜、又BBQ又火鍋即煮有機菜，玩咗足足大半日，對於大人同小朋友來說都是開心愉快的，而且個人認為相比只有摘士多啤梨的單一活動好玩得多！農莊採用流動式廁所，衛生情況可以接受，不過若帶同BB前往就必須另找地方換片。

只是一有點不能不提醒各位的，是現場不時飄來附近豬場的臭豬味，絕對影響胃口。而且此農場更有超多蒼蠅飛來飛去，BBQ開餐區雖已加入防蚊防蒼蠅的圍網，不過仍有不少蒼蠅飛入，讓人非常困擾。負責人指因為是有機農場的關係，不能大量使用殺蟲劑，已邀請來自美國的專家希望解決「蒼蠅之患」。然而此問題似乎並非一時三刻能解決得到，大家去之前要有心理準備呀！

曉峰大江埔農莊

會員登記網址：https://goo.gl/Uk6LJV

交通：西鐵站錦上路C出口，乘塔大江埔小巴總站落車，步行約5分鐘