【今非昔比】小孩不像小孩的年代

特別「聽話」嘅小朋友其實係壓抑緊自己嘅負面情緒，處處遷就其他人而委屈自己，因此佢地同家長相處係難以有開心嘅一面，表情望落雖未至於唔開心，但就會成日木口木面。另外小朋友仲會變得唔敢表達自己意見，係學習上傾向保守，唔敢發揮想像力、創意，通常教育出呢類子女嘅父母，係我眼中可能比較接近「馴獸師」。

講起馴獸師就令我諗起早前一宗係內地發生，有關老虎襲擊人嘅個案，大槪係講一名男子企圖逃票，私自闖入動物園範圍，最後比老虎殺害。

最令我不解嘅係事後竟然要處決隻老虎，個世界發生咩事，隻老虎只係做返老虎都要死？原來個社會已經病態到唔接受老虎 being a 老虎，我諗深一層，其實我地又何嘗唔係一步步咁將呢種錯誤思想融入自己嘅教育之上，我地接受到「小朋友」做「小朋友」咩？

一個小朋友，活潑好動係應該嘅，但呢種正常嘅活潑好動係部分家長眼中就變成「唔聽話」、「過份活躍」，於是又帶佢地去檢查睇下有冇事。家長又會驚小朋友「輸在起跑線」，於是同學校兩面夾擊，專比越級難度嘅嘢小朋友做，K1就寫筆劃複雜嘅字，K2就做閱讀理解，其實本身個小朋友係無事嘅，最後都比我地搞到有事。

最可悲嘅係，情況已經病入膏肓，有唔少家長即使察覺問題，但原來依家想小朋友做返小朋友嘅成本係十分龐大；想少功課，OK比錢讀私幼、國際幼稚園，口碑好嘅學卷幼稚園仲要搶崩頭。想玩得開心？OK，報Playgroup，各式各樣收費兒童遊樂場。不過其實玩都可以簡簡單單落街跑下步，行下公園！OK，在職父母有時間咩？無又要請工人，想小朋友做返小朋友通通都要「錢」！仲未講香港地公園限制多多，草地唔比坐、風箏唔比放、單車唔比踩；不過一個公園最重要係咩啊，係小朋友啊，即使我同小朋友落公園，都無人陪佢玩啊！

每個年代嘅人，生活方式都唔同，可能係筆者比較敏感，自認為如今有唔少小朋友無咗果種應有嘅稚氣，反而多咗一份唔應該有嘅憂愁，甚至欠缺個人思維，需要指令驅動。曾經有幸聽到一位大學生同我分享佢嘅價值觀，令我印象十分深刻：

「呢個社會話就話人比人比死人，但真係做到唔同人比較有乜可能啊！不過我就鍾意同人鬥開心，鬥生活舒適。」

所以如果唔想「輸在起跑線」要做嘅會唔會就係單純嘅尋開心呢？

*以上文章只代表投稿人立場，並不代表《親子頭條》立場

如果讀者有興趣投稿，可把文章 E-mail 至 editor@parentingheadline.com 並寫上「讀者投稿」及註明題目，一經選用有機會刊登在親子頭條網頁及Facebook專頁。

圖片：網絡