【埋身餵母乳】小編：「係咪我餵佢唔飽？」

話說我哋Summer小編已經出院返到屋企坐緊月，同時開始咗佢嘅人奶路。不過一開頭難免有啲手忙亂腳，而且仲有啲蝦碌事添！

好多新手人奶媽都會有疑問，就係埋身餵母乳唔知道「BB究竟食咗幾多？係咪食得飽？」Summer都係其中一個有此疑問嘅新手媽媽。加上Summer BB回家首日即使密密吃奶都依然喊個不停，所以就令佢超擔心，不斷懷疑自己唔夠奶餵唔飽愛兒。

其實嬰兒喺媽媽肚內生活咗10個月，初來到呢個陌生世界仲未適應係好正常嘅。除肚餓外，包被包得佢唔舒服、尿片痾濕咗、太凍太熱溫度唔啱，或者肚仔有風唔舒服，都有機會令BB呱呱大叫，所以初生BB喊唔一定係肚餓！點解我知？因為我都係媽媽呀，因為我個仔頭3個月都係每晚喪喊喪扭！嗚！

正所謂：「當局者迷！」剛生產嘅Summer雖然平日非常精靈，不過佢同大部分產婦一樣，都係會擔心BB食不飽嘅。

所以…

Summer老公見Summer密密餵奶覺得BB唔飽，返屋企第一日就即刻落街買奶粉。但後尾發現補粉後，BB都係隔兩個鐘就喊。(所以唔關人奶食唔飽事啦！加油呀！)

為咗知道自己究竟有冇奶，Summer嘗試泵奶再用樽餵，好處係清楚畀自己同身邊人知道究竟有冇奶，又可以知道BB食咗幾多，釋除無奶嘅疑慮。然後，奇怪嘅事就發生咗！首次使用電奶泵嘅Summer啟動奶泵5分鐘後，竟然發現：乜！都！泵！唔！出！

正在驚慌之際，馬穎叫Summer send幅相嚟睇下，原來Summer只想泵一邊胸，但插咗for雙泵用嘅Y型喉！應該用返單條喉先啱呀！哈哈哈！係咪好蝦碌？(最後係成功泵到奶！阿B係有奶食架唔使擔心！)

好彩到健康院首次檢查後，BB一切正常，而且Summer見過母乳姑娘後，姑娘都話Summer「做到幾好、對佢有信心！」我哋都一齊支持下佢啦！加油呀！You are not alone！