【產前病房百態】未入過都唔知咁驚

先從去到產前病房開始說起，一去到真係好茫然，直衝入去搵姑娘，當然就被指出門外坐底等候，一等就等咗成個鐘，中間有廿幾週的孕婦表示肚痛，小編見狀都覺得佢好痛，於是佢當然係更早被安排入院。終於輪到我啦！入到房內姑娘就問咩事、做咩會返嚟等等，我將情況報告之後，本來阿B開始又郁返多啲，心諗快啲回家唔想留喺度，點知係唔會理我講乜嘅。

跟住姑娘就幫我做簡單檢查，先摸肚、度BB位置、度高量重等，之後完成手續，我就被安排一張病床及一套病人服，然後，就入病房換衣服、驗小便，之後就一直坐在床上等候……等的期間不時傳來淒厲的叫喊聲，應該是作動中的孕婦陣痛所發出的叫聲，已經覺得有點驚。

終於，有姑娘安排我去接駁胎心機，監察BB的心跳，聽著BB的心跳聲安穩，我都漸漸想進睡，突然簾外聽到一位即將要進入產房的婦女叫喊，應該又是痛得厲害所致。

雖然感到有點驚，但只想到當媽媽真的很偉大，當然我自己則是感到驚怕。

聽完胎心，就去見醫生照超聲波，BB非常正常，醫生說只是寶寶肚仔稍微大了點，有需要兩星期後回醫院照，或者要催生。當然令我大為緊張，但當下我比較緊張是否可以出院，醫生就說沒甚麼大問題，BB有正常郁動就可以回家。滿心歡喜回到病床，等姑娘安排出院，點知醫生過來說不如明早再回來做多一次「糖水測試」，當下唯有說好。

結果第二朝晨咁早又回到醫院做TEST，病床附近都有幾位不同進度的孕婦，有人穿水、有人見紅，亦有人要入院催生，聽到周圍的氣氛都很緊張，而我抽完血飲完糖水之後，就要休息兩小時再抽第二支血，休息期間已聽到有孕婦問醫生可否回家等待，醫生則沒有批准，半睡半醒之際，突然聽到有人大聲說：「佢唔畀我返嚟呀，我點知啫，你自己嚟問佢囉。」大概是有孕婦未生得，又不能出院，而電話另一端又傳來查問聲，令其大為震怒所致。

另一端，又聽到另外的產婦由醫生檢查宮頸看進度，聽到慘痛的叫聲，真的令人怕怕，最後醫生決定落藥催生，女士又要考慮是否洗頭沖涼；另一邊的孕婦見紅，後來被安排過產房待產。

只是短短的數小時，產房已經有多個不同的情況發生，真的令人十分之緊張。而我飲完糖水兩小時，抽好血之後，就出院回家休息去，連醫院的費用都拋諸腦後，直至回到家中才醒起「走咗數」，及後唯有叫老豆幫我去交錢了事。現在既期待BB的出世，又已經開始不捨他離開我的肚子‧‧‧‧‧‧