【燉洋蔥止咳殺菌】小童、孕婦、人奶媽都食得

自己咳自己辛苦唔緊要，最擔心係將病菌傳染比小兒。但由於媽媽我仲餵緊人奶，所以又唔想睇醫生食藥(我知，只要同醫生講餵奶，佢會開啲溫和嘅藥，可以唔影響餵奶嘛！)唉，我都餵咗成年人奶又點會唔知呢？之但係，我試過幾次咳去睇醫生，食咗幾次「溫和藥」都唔好。醫生都話無辦法呀，唔可以開啲勁藥畀我，係要等自己慢慢好，咁所以我寧願唔睇啦！

圖片：互聯網

直至我知道咗燉洋蔥呢個方法之後，簡直覺得洋蔥太偉大喇！止咳真係一流，簡單易整、成本又低，而且好好味！個人覺得好味過燉橙10倍！但如果你本身唔鍾意洋蔥味就無辦法啦！

點整？好易，先將洋葱去皮、切開，隔水燉20至30分鐘，視乎你個洋蔥有幾大個啦，大個就燉耐少少！

燉好之後碗入面嘅洋蔥會流出洋葱汁，洋蔥汁會吸晒入碟仔入面，我就將洋蔥水畀我一歲嘅小兒飲，可以止咳，無咳就當保健殺下菌咁。因為味道係甜甜哋嘅，所以佢都好鍾意飲唔抗拒。我呢幾日咳到甩肺就自己飲晒啲洋葱汁之餘仲成個洋蔥食埋，食咗兩次之後就無咳喇！堅有用架！

燉好之後係咁嘅，洋蔥上面一粒粒果啲係粉紅岩鹽，燉後加入去嘅，好味喎！

上網睇過資料話洋葱功效同葱、蒜類相似，都係有殺菌作用，對於寒咳有一定幫助。

我之前都介紹咗呢個方法畀我個咳到死死下嘅孕婦朋友試，佢都話真係得。當然，如果擔心自己唔適合食洋葱就問下醫生先試囉！始終每個人嘅體質都唔同架嘛！