【甘寧老師】不是父母的父母

工作逼人，即使已經身為中產人士都冇得鬆懈，父母陪唔到仔女玩，於是出現左Playgroup、N班，搵錢去比錢人陪仔女玩；父母照顧唔到仔女，於是聘用工人姐姐或交由長輩照顧。感情係需要透過相處接觸、良好溝通去建立，如果想係股票市場賺一筆要投資金錢，係感情世界就要投資時間。

雖然仔女長大後，生性嘅都會明白同體諒父母苦況，但眼見仔女同爺爺嫲嫲甚至工人姐姐相處更加自然，心裹百般滋味在心頭。

既然相處時間無可避免咁減少，咁作為父母自然要提高相處同溝通質量，控制好自己情緒唔好係又鬧唔係又鬧，好似仔女係公園玩唔小心整親自己，你鬧佢：「做咩咁唔小心，叫左你唔好跑咁快！」其實唔單止表達唔到你內心關切嘅諗法，更加會令仔女覺得父母係一個怪人！

「乜整親自己都要比人鬧，個世界發生左咩事？」

而香港家長普遍比較內斂，對年幼小朋友其實可以多將「愛」宣之於口，攬、抱、錫都係直接嘅表達方式之一。

一位好嘅朋友講求交心，即使日日相處都可以係酒肉朋友，父母亦如是，真係做唔到陪伴子女成長嘅父母，不妨盡自己最大努力，成為子女的交心父母。

圖片：陳維旭