【超平童裝玩具開倉】198蚊貨車仔有得砌有得坐

當然其中一個目的是順便跟進一下呢間開倉會唔會好似Gap Outlet咁不思進取，又加價又再無靚價咁。參考連結：【好無癮】Gap Outlet童裝忽然加價

誰不知「唔去由自可，一去又破財！」...真係好多正嘢，唔信你碌落去睇下啦！

一走進店內發現全場裝潢基本一樣，但貨品擺位略有不同，童裝返咗好多新貨。

眼前不單多了大量童裝衣物新貨，大大小小的玩具選擇比之前到訪時多了很多。

店內更安裝了一個大投射屏幕，播放卡通片。店主說是希望媽媽在shopping的同時，小朋友可以有啲嘢睇下無咁悶。

呢個搖搖小馬係新返架，睇到我都想玩，售價$399。其實我曾經喺坊間啲Play Group場地見過呢個小馬，只係冇諗過原來可以買返屋企自私玩！不過就要屋企地方夠大先擺得落。

查問下發現上次介紹果款廚房同打鼓玩具原來已經補過幾次貨！現場好多小朋友都埋頭玩完又玩！參考連結：【150蚊買滑梯】兒童用品開倉大特賣

嫌紅色小馬太大，仲有呢個小巧啲嘅啡色搖搖馬仔，毛茸茸咁都好得意架，另有白色同粉紅色選擇，售價$298。

其中最吸引我眼球的其實是呢款黃色BB貨車仔！有咩咁特別？如果大家係我哋忠實嘅《親子頭條》讀者，一定有印象上次我曾介紹過尖沙咀Mattel玩具開倉 ( 參考連結：【超突然！】尖沙咀名牌玩具開倉 ) 當時咪有一架玩具車賣200蚊好抵買嘅，但首天被搶購一空，我只能遠觀而不可褻玩，嗚嗚！今次竟然畀我喺呢度見到同類型貨車仔，都係賣$198，平多2蚊之餘，我覺得呢架仲靚仲好玩，完全無唔買嘅理由！

黃色的貨架可以揭開，變身可讓BB坐的學步車仔 (黃色的貨架可整個拆除)。經我人肉測試過都幾實淨架！

車頭控制盤位置設有3個按鈕，可以發出唔同嘅聲效架。

貨架上除咗可以畀小朋友「運送」玩具外，跟車仲有一袋積木，畀你砌上貨架上面，超正喎！我要買！我要買！

至於呢個咁有型嘅電單車，真係入電玩架！售價：$468。

呢架車唔使入油，係充電玩嘅。

車輪位置喺電單車啟動時會著燈發光架。

後方就有個盒仔。

打開可以畀小朋友擺放隨身小物。

雖然我自己都好想玩，但因為呢架車係畀小朋友玩嘅，所以我唯有喺現場欣賞店主小兒坐電單車嘅英姿！

其實佢係一個3輪嘅電動車仔，速度唔係太快架咋，現場睇落小朋友玩得都好穩定嘅，當然家長要確保開車嘅環境係安全啦！喺街玩就唔好喇！

唔鍾意玩車仔呢類咁動態嘅活動，可以玩彈琴呀，黑色玩具琴$488，紅色小琴$328。

黑色玩具琴真係可以畀小朋友坐低彈架，好得意呀！呢個琴又係要推介下，我喺青衣一間音樂教室見過，標價$799呀，呢度500蚊有找，係咪抵先？屋企有位真係冇理由唔買！

上次個廚房玩具好正，新返呢個超市系列仲正，兩個小朋友可以一個扮收銀、一個扮買嘢。

呢個IceCream Shop又係好得意，售價$198。

男仔唔鍾意煮飯仔、買餸呢啲玩意？冇問題！玩工具啦！售價$148。

其他新貨仲有呢款軟綿綿嘅陪睡兔仔，初生BB啱用！$38咋！

同埋呢兩款Doraemon同Hello Kitty遙控車仔，喺玩具反斗城特價時都要二百幾蚊，呢度賣緊$78咋，係必掃item呀真係！

呢款平通街嘅廿蚊munchkin ABC貼都返咗貨。其實我真係非常好奇，因為經常四圍格價嘅我，知道呢款ABC貼同上次果款香蕉牙膠真係無可能賣20蚊咁平，所以就忍唔住問下店主究竟點解可以賣咁平。而身為爸爸嘅店主就淡然稱：「其實呢款ABC貼原本只係諗住清貨。但因後來太多客人查詢，自己都係為人父母，唔想見媽媽客人嚟到買唔到嘅失望樣，所以就決定再入貨，用入貨價平手賣出，等大家都開心下啦！」

呢種「將心比己」嘅做生意態度真係好好！我本人就好欣賞喇！所以雖然我原本只係為大家跟進下有咩新貨平貨，但最後我自己又放低錢，自己買又幫媽媽朋友買咗3架車仔、兩盒ABC貼！真金白銀賣架我真係，無收回佣、唔係廣告嚟架呢個！

好彩有人幫我手拎咋！特別嗚謝A先生同L先生仗義相助搬車。

睇到呢度有冇發現我淨係講玩具冇講童裝呢？因為太多新貨喇，要留返下一篇先介紹呀。最後又提提各位，呢度星期日唔開架！星期一至六嘅營業時間係12-7pm，唔好星期日去摸門釘呀！

地址：葵興樂聲工業中心B座14樓