【甘寧老師】開學之成功論與盡力

返學本應是一件開心事，但係香港就唔係人人都開心回校，有輔導機構熱線係未開學之前已經接獲近六百宗求助，表示擔心新學年的讀書壓力同朋輩相處；而更有名校未開學先「評估」，其實同考試無乜分別，又真係難怪同學黑口黑面返學！

父母照顧仔女係責任，仔女無工作負擔，好好返學讀書都係佢地嘅責任，但係問題嚟啦，究竟小朋友「讀好書」定義係邊？每個家長答案都唔同，但唯獨有兩個字一定係絕大部分家長都會講，而仔女聽落仲難聽過粗口嘅果兩隻字「盡力」。

「啊仔啊女，結果係點唔重要，最緊要盡左力！」

「盡力」和「上進心」都係一個好抽象嘅概念，兩者都可以話係一種主觀感覺。家長可以透過自己觀察去分析仔女有冇「盡力」，但殘酷嘅係每個人資質唔同，同時間社會風氣又搞到家長特別緊張自己仔女落後於人，慢慢「盡力」兩字開始變質。

所謂變質，簡單嚟講就係成件事調轉，由盡力去做，結果唔重要演變成家長透過觀察結果嚟評論仔女有冇盡全力。

當然懶果d就抵鬧啦，但有好多同學好勤力上一大堆補習班，放假又一堆興趣班，日日做功課做到10點幾，成績都唔符合家長要求呢類同學，你鬧佢地未「盡力」即係直接否認左佢地嘅努力同付出，所以「盡力」呢兩個字家長一但用錯，小朋友嘅前途同學習心態分分鐘就會毀係你手上。

社會不斷投放資源係教育方面，而我認為現今最需要教育嘅反而係家長，家長嘅教育理念、溝通方式，係直接影響仔女嘅好與壞。天下間無一出世就曳嘅細路，只有唔識教嘅父母，下次仔女成績未如理想時，先問問自己，有冇「盡力」教育仔女？

唔知道係有生之年，可唔可以見到開學日街道上係一群笑容滿面嘅小朋友！

圖片：網絡