【甘寧老師】650萬層樓 梗係爹哋買啦

「成功需父幹」就係近呢十年冒起嘅諷刺語句，原因不乏係因為每當有年輕人成功置業的報導刊出，前文用左好大篇幅講個年青人點努力，同女朋友點死慳死抵供樓，而最後就會出現一句，首期由家人幫助支付，真係次次睇親呢d報導都令人覺得社會充滿希望。

而最近期嘅元朗新樓盤Grand Yoho，一位22歲後生仔同父母成功購入一個約650萬單位，面對記者提問，呢位後生仔都好真誠咁回答！

「層樓邊個買o架?」

「梗係爹哋啦！」

「係咪自己供?」(月供約2萬3)

「自己供到都好啊！」

雖然有部分傳媒將訪問內容剪輯走左，誤導左讀者以為層樓係父母買比呢位後生仔，但其實個後生仔有講明層樓係父母買同供，而名都係落父母。

不過就我自己立場嚟講，都無話咩誤唔誤導，因為我就唔信佢地層樓最後唔係比返佢個仔，所以就算話佢22歲做左業主我都覺得不為過！

從訪問中簡單幾句對答，唔難發現其實呢位後生仔同大家都好清楚，靠自己想買到樓係一件冇乜可能嘅事，不過只係佢比大家好彩，老豆有錢幫佢完成左置業夢。而香港地樓嘅重要程度相信大家都好清楚，尤其係香港地做男人，冇樓想結婚生仔簡直係天方夜譚！即使你遇到個好女仔真係覺得冇樓都可以，佢地屋企人果一輩又會點諗呢？你又忍唔忍受到果種目光？

樓係香港更加係一隻識生金蛋嘅雞，有樓渣手嘅人只會越嚟越有錢，甚至乎佢地買完層樓租出去，都一大堆人搶住幫佢地供樓，所以係香港地有樓真係無得輸！

亦都正正解釋到全世界得香港呢個地方，後生仔買個豆腐潤咁細嘅單位都可以上頭條嘅原因。

香港房屋問題一向都係擴大貧富差距嘅主因之一，年輕一代難以負擔之餘，公屋更加輪唔到佢地，大部分單位都比新移民住晒。

種種社會問題逼使年輕一代更關心社會同政治，甚至出現由年輕人組成嘅政治團體，我唔評論呢d政治團體做得好定唔好，但我認為社會係需要呢一班嘗試改革、嘗試改變現況嘅年輕人。

圖片：網絡