【甘寧老師】何謂失金？

首先我唔係好理解，一樣唔係自己嘅野點解可以用「失去」嚟形容咁厚顏無恥，你未拍拖又何來分手呢，完全唔合邏輯！

係我角度嚟睇今年中國輸嘅並唔係金牌咁簡單！連風度，體育精神都輸埋。

首先，係一開始連自己國家嘅國旗都出錯果陣，已經樣衰左，跟住落嚟嘅孫楊禁藥事件更搞到滿城風雨，面對其他國家選手質疑，回答唔得體都算小事，其後更不幸地入唔到決賽，總總事件串連起來，不禁令人懷疑孫有心輸比賽嚟逃避決賽血檢，最終都證明唔到自己係清白！

而大部分內地網民嘅回覆令到事件更加肉酸，除左用一d無人明嘅英文係人地到洗版，引起連串笑話之外，思維更加係錯晒！

我唔評論到底係咪「全世界都針對中國」啦，不過有人質疑自己國家有人食禁藥果陣係咪應該去證明自己冇，而唔係抱住一個心態：你地外國仲多人食啦，係要針對住我。

其次，奧運會雖然主張嘅係運動精神，但大家都明白係國家之間嘅軟實力較量之一，我諗全世界得中國媒體會做呢種傻事，獎牌榜比人超越固然唔好受，但有乜理由係自己個官方Twitter到打句「You kidding me？」嚟表達自己不滿嘅情緒呢？講到人地英國好似唔可以超越中國咁，小器到極！

睇奧運其實唔一定要支持自己嘅國家，可以係支持場上每一位努力付出過嘅運動員！大家千奇唔好比d媒體洗腦，用返一個符合運動精神嘅心態去觀賞每一場賽事，你會睇得更開心更投入！

圖片:bbc news & 網絡