【教壞細路】牀邊故事不可以亂買

這位家長買了一本寫明啟迪高智商的牀邊故事，但其中一篇內容卻令人看到覺得驚訝，故事講述一位女廚師自己吃了主人宴吃的烤雞，然後，當客人到來時就騙客人說主人要切掉其雙耳，及後又對主人說客人偷走了兩隻雞。

結果，她因為其謊話脫險，正常一看就知道女廚師做得不對，然而，故事最後結語竟然說她在陷入困境時情急智生，化險為夷。

雖說故事乃出自格林童話，但其最後的結語，亦難免令人覺得其有教壞細路之嫌。

該家長說：

借朋友相片分享：話說朋友隨意買左本床邊故事書同小朋友講故事，但講講吓發覺中伏。以下圖片係其中一個書內嘅故事，亦係最離譜嘅故事，內容自己睇。
我想講，我深信一個人嘅價值觀同道德觀如何，同佢小時候家庭同成長時如何被教育有好直接關係。我想像唔到一本小朋友嘅故事書可以歌頌欺騙、鼓勵不誠實、自私行為、走精面，自己呃人、不盡忠職守、講完大話後仲讚佢叻仔？離晒大譜！點解咁嘅書會有人寫、有人出版？小朋友未識明辨是非，書內鼓吹咁嘅思想，係咪叫佢大個要偷呃拐騙？呢個世界真係痴線。
呢本書令我記起「大時代」一個劇情：丁孝蟹細個去士多偷嘢，丁蟹知道後鬧孝蟹好去偷嘢，孝蟹之後話佢偷嘢俾細佬食之嘛，丁蟹知道後就話「咁就乖仔啦。」我睇劇集時覺得好好笑，好荒謬。而家喺真實世界竟然有同樣荒謬嘅事發生，其實係一啲都唔好笑。

續說：(無諗過會發到咁大，我諗我有責任講清楚：經過查證後，呢一個係格林童話其中一個故事，不過我想講個key係最後一版「親子蜜語」。無論故事出自邊度，家長或大人都應該灌輸正確嘅價值觀俾小朋友，我唔認為佢個conclusion係正確，呢個亦係我覺得本書過份嘅原因。故事出自格林童話亦唔代表啱小朋友睇，講完。）

最後，各位家長相信為孩子選擇故事書，以及向孩子講故事時，都要小心選擇，以免教了子女不正確的價值觀。

相片來源： Anthony Li