【甘寧老師】是野蠻的思維締造怪獸家長

而所謂以自己個人角度為出發點嘅教育方式簡單d嚟講姐係野蠻同自以為是，以為自己對仔女好，幫佢地報一大堆興趣班，結果反而磨滅左仔女嘅學習興趣；限制仔女玩樂時間，以為可以令佢地專心學業，結果無處宣泄壓力。

仲未了解咩叫怪獸家長唔緊要，例子馬上為大家呈上！近日於Facebook大埔群組怒罵老師教嘅舞蹈太難，令佢個女受傷，仲要著埋d性感衫，走光點算！聽落去似乎好有道理，而佢都以為自己好有道理，將所有對話內容直接Post出嚟。

原來所謂嘅困難動作只係跪地轉兩圈，性感衫原來包到實一實都算，原來個女都14-15歲，自己都應該有責任保護好自己啦，唔通要個老師底褲都幫你Check埋咩！

事件詳情：http://bit.ly/2aFA9Kt

再講多一件再近期d嘅犘士公園捉精靈事件，有一位女士帶住仔女捉精靈行入足球場，比人撞親。同行友人即刻拖住仔女搵球員理論，大大聲咁鬧：「踢波係咪大晒啊！」，我當堂嚇左跳，拖住仔女都做唔好身教，我踢緊波你入嚟阻住我都未話你，你仲咬返我轉頭！睇嚟以後揸車嘅人要小心，紅燈有人衝出嚟比你車親分分鍾都係你錯！

事件詳情：http://bit.ly/2b08iW2

總括嚟講怪獸家長最難搞嘅地方就係永遠都會以為自己啱，你幻想下同呢類人溝通係幾咁困難嘅一件事，有佢講無你講，其他人唔認同就係佢地嘅錯，真心希望佢地仔女唔好學佢地。

有時候只要多d企係其他人角度出發，即使行為怪獸都無任何人會質疑，你幫仔女報十個興趣班，行程排得密密麻麻，但全部都係有溝通咁安排，符合仔女意願，咁仲有人會話你怪獸家長咩？