【甘寧老師】連「怕醜草」都容不下的家長

我講緊嘅係最近傳媒爆出嚟嘅一件事：漁護署被指因收到家長投訴子女遭怕醜草(含羞草)刺傷，於是將草群移到另一處重新種植，並裝上圍欄，最後仲比人發現，移植完之後d怕醜草差唔多死清光。

成件事對我嚟講只可以用四個字形容－「匪夷所思 」。成件事實在係疑點重重，有幾個位我諗極都諗唔明！

1.收到家長投訴子女遭含羞草刺傷，於是將草群移到另一處重新種植，並裝上圍欄

我冇親身去過現場，都唔了解本地佢地嘅生長情況係點，但係我估計個小朋友會被刺傷都係因為本身冇圍欄姐，我認為我咁諗都好合理！咁係本身個地方圍返咪得，點解要移植完先加圍欄，唯一可以解釋嘅就係原本個地方唔方便加建圍欄。

2.點解要跟進呢單投訴

你落街食碗平價車仔麵咁啱用木筷子果陣不幸㔆刺，你會唔會投訴間餐廳/製造商啊！我當你咁低能真係會，間餐廳/製造商又會唔會真係咁低能幫你處理。

依家成件事就係兩方面都低能，但係普通市民咩人都有，總有一兩個低能唔出奇，但堂堂一個政府部門都咁樣，叫人點信服。

＊(個人認為合理投訴的確要處理，但不合理投訴就要盡快打圓場，唔好浪費時間同資源)

3.點先做到比怕醜草刺傷

究竟個小朋友做左d咩先會比怕醜草刺傷又係一個我諗唔明嘅點，我用盡想像力都係諗到可能係個小朋友貪玩，不慎跌倒係怕醜草堆入面然後受傷，但係如果係咁嘅話就係小朋友同家長問題，點解要屈落個無辜嘅怕醜草身上，你地做人要有返d良知，唔好恰棵唔識講野嘅怕醜草！

呢類無道理但又大大聲嘅風氣係近年越嚟越常見，尤其做零售行業，成日遇到d客嘅無理要求！佢地已經態度唔好，但我地仲要扮死狗係到「不好意思，我們會改善！」，但勢估唔到情況已經蔓延到連日常瑣事都要無理取鬧埋一份！更估唔到竟然有人陪佢地癲，助紂爲虐！明知佢地唔啱都唔反駁！理由當然都不外乎係為搵食、老細話事、客人大晒......但自己嘅尊嚴就比唔上呢d咩！

我地依家已經陷入左一個惡性循環，我地不斷助長呢d行為，無理取鬧嘅人只會越嚟越多，其實成個社會風氣，真係可以一人一小步改變，共勉之！

圖片：網絡