【甘寧老師】由幾時開始我地變得期望天災

我諗全世界得香港先會咁畸形，期待天災出現令自己可以休息一日半日。雖則颱風唔算係大型威脅嘅天災，但畢竟仍然有其危險性，但我地似乎都已經唔在乎，我地只係想個8號波持續一日，比我好好全日休息。

香港嘅老細們就出名苛刻，有時我都真係唔明點解佢地要做埋一d損人不利己嘅行為！好似打風咁，有d人收5點，你叫佢轉3號波後2個鐘內返到，分分鐘都係返去坐暖張櫈就走人（唔洗OT的話），我明，要你白白出一日人工好唔抵，但有時d野睇長線d，你少少嘅從寬，唔單止令員工做得更開心，仲會令員工更有歸屬感，你都唔想個個月重新請個人返嚟train過掛？(通常會成為佢地「輸入外勞」嘅借口)

更加唔好講大部份寫字樓工，工作量就係咪都咁多，放佢地一日聽日返工咪又係要追返進度，所以何必逼人返果一陣又影響士氣呢。

除此之外，係金錢至上嘅香港，我地當然唔關心颱風有冇導致傷亡，即刻屈指一算計下冇左幾多錢先，由於港股今日得半日市，成交量大減，加埋其他雜項，差唔多冇左成50億。

每次見到呢d報告我就會好嬲好炆，損失錢嘅咪又係你地d有錢人，仲要係帳面數！成日講到呢50億好似我地有得分咁，做少兩單大白象工程我都已經好開心啦，果度講緊嘅已經唔止50億！

係香港搵錢至上嘅風氣已經根深蒂固，的士佬就係當中嘅表表者，食住個颱風屈你一筆，平時拒載都算，依家仲座地起你價，都無人治到佢地！

係香港好多人唔記得左一樣野，當權者嘅權力來自人民，當佢地恰返你轉頭而無人出聲果陣，This city is dying。

最可悲嘅係我地生活係香港，工時最長但人均壽命最高，仿佛係到諷刺我地係最佳嘅奴隸品種，宣佈3號波冇幾耐，巴士排長龍，地鐵逼爆。每個人嘅面口都黑過芝麻糊，而當中總有我最憎嘅「究極痴線佬」係入面。

我所講嘅「究極痴線佬」係果d好緊張會遲到，返少陣工會死果d，到底佢地係人，定已經變成左行屍走肉，我已經唔清楚了......

圖片：網絡