【甘寧老師】想教好仔女 一定要帶佢搭輕鐵

1.訓練誠信

可能唔係住係元朗區或屯門區嘅人對輕鐵可能比較陌生，輕鐵嘅入閘設計簡直就係訓練仔女誠信嘅最佳教育工具！因為月台係可以自由出入，收費方法就係大家要憑良心，上車前係月台拍「入站」落車拍「出站」，而且只可以單一方向乘車！姐係你想坐返轉頭，都要好自動自覺落車拍「出站」再拍「入站」再上返車！

 

當然偶爾都會有工作人員查飛，但大部分時間成個交易大家都係講個信字 。

2.訓練記憶

搭輕鐵除左訓練到仔女誠信之外，對記憶力提升都有幫助！因為拍左「入站」之後唔記得「出站」係會扣最高單程車費！同時由於月台係可以自出自入，有時都會懷疑自己係咪未入站，好似冇乜印象自己拍過卡咁，一陣比人查飛咪又要比人罰錢！

3.訓練EQ及明白運動的重要性

輕鐵月台並不大，但係人就好多！除左等車嘅乘客多之外，「波板糖人」都好多！(車站助理會拎住酷似波板糖的指示牌工作，因此網民形容他們為波板糖人），每一對車門都會有2個，不停重複住講「先讓乘客落車然後上車」、「請企係黃線後，危險啊！」等錄音機都做到嘅功能，令擠迫嘅月台更加擠迫！

雖然駐場的「波板糖人」有很多，但仍無礙大家玩美式足球的欲望，車門一開，雙方陣容就會發生強勁嘅碰撞！個身子潺弱些少都會比人撞散，比人撞多兩撞仔女就會意識到平時做運動有幾重要。

 

 

 

(*講明先，我覺得「波板糖人」都係為左份糧做野，有冇用就見仁見智啦。)

而係月台嘅乘客就好似餓鬼咁衝入車廂將全部座位瞬間吞噬，當然其間少不免同想落車嘅乘客有磨擦，繼而在車廂外發生口角爭執！車廂內嘅乘客都不甘示弱，

「我睇到先o架個位」

「但係我坐先啊嘛」

整個月台及車廂嘅氣氛令炎炎夏日繼續升溫，仲增添多幾分火藥味，呢個時候你帶埋仔女企係一邊！成堆反面教材任你用，我相信只要用得好、用得恰當，仔女嘅Emotional Quotient又點會無進步呢！

每次同仔女坐完一次輕鐵我都可以好自豪咁講，我地坐嘅唔係一架開往家中嘅輕鐵，而係一架昇華品格嘅列車！

圖片：網絡