【甘寧老師】成年人都係小學雞？

我望住街邊嘅兩位小學生玩包剪揼，發覺我地細細個就有做成年人嘅天份。

「輸左請野飲一鋪過！」

「好，嚟啦！」

「好耶有野飲！」

「咩啊三盤兩勝玩開。」

我細個果陣以為國家大事都會係一d難以理解嘅事，但慢慢發覺其實佢地有唔少行為都係同小學生心態差唔多，不外乎係我唔鐘意你，你唔鐘意我；我防範你，你又防範我，諸如此類。當一個細路仔，做一啲發脾氣，不可理喻嘅事情，家長一定會嚴加教育一番！但當一群成年人做小學雞行為嘅時候，又有邊個去教育佢哋？

世界從來都無絕對公平，少數服從多數都係想滿足最大部分人嘅利益，少數服從多數可以話係社會上必需要嘅機制之一。

但英國公投一結束，一大班人唔服輸要求再投！理由亦都千奇百趣，層出不窮。

有人話自己投左鬥氣嘅一票，根本無諗過脫歐派會贏。嗯.......投票投對家係咩戰術？

由於本次投票不設投票率門檻，因此有人話投票率不足75%，要求重賽！咁不如直接改成只可以投留歐，反正做到100%都無可能，投票率夠75%輸左，又會要求達85%，一直重賽到滿意為止？

有年輕一輩直斥被年長人士騎劫，指責比人出賣。Sorry，基於安全性問題，大型公投唔會有網上投票，年輕一族因而投票率偏低，懶係無得救嘅！

當然投票呢樣野仲有好多方面更具哲學性嘅睇法，唔少調查都顯示學歷越高越想留歐，難聽啲講句，投票會唔會係蠢人亂決定國家大事？有非英國出生嘅居民投票，佢地d意見又點計？

其實呢啲輸打贏要嘅心態，係日常生活中都會見唔少，d人為左自己利益，死嘈爛嘈，大聲當有道理！

「咩話？買第2件半價，你啱先做咩唔同我講，我唔理啊我要用半價買第2件。」

「唔好意思，我啱先有提你，係你話唔洗，同埋你想享用呢個優惠可能要另外再買兩件，真係唔好意思！」

「我唔理，你做唔到就投訴你。」

我地一定要接受個世界冇野可以盡善盡美，大家接受並參與同一場遊戲，就要跟隨遊戲規則，唔可以輸打贏要。更可行的方法係，分享理念，了解雙方。嘗試諗方法不斷改善遊戲，令遊戲更公平，更接近理想。

 圖片：網絡