【珍寶豬欄】你厚多士啊！太太

我：「請問係邊位睇嘅呢？」

媽媽：「我睇呀～」

我：「好嘅，未睇過㗎嘛？麻煩俾身分證我登記啊！」

媽媽：「我嚟驗孕咋」

我：「驗孕都要登記咗先嘅～」

小妹妹問媽媽：「乜嘢係驗孕啊？」

媽媽冇回答，小妹妹轉向問我：「姨姨，乜嘢係驗孕啊？」

多數媽媽唔答都應該係有原因，我就梗係要避開：「你媽媽佢要見醫生叔叔啫～」

小妹妹：「咁點解媽咪要見醫生叔叔呀？」

唏！我再扭再避：「哦～呢個你問你媽媽啦！」

小妹妹拉拉媽媽衣服：「媽咪，點解你要見醫生叔叔呀？」

媽媽不耐煩：「唔好問啦～成日乜都問，我講咗你會識咩？」

說話就唔係咁講啦！你唔講我又點會識，你唔講我又點會明，你唔教我又點會識呢？

小妹妹嘟起小嘴，嬲爆爆咁自己去搵位坐低。

坐喺小妹妹側邊嘅太太講：「驗孕呢，即係你媽咪有咗呀！」

小妹妹：「有咗？」

太太：「即係你會做家姐，你多個細佬或者細妹呀～」

小妹妹飛奔去媽媽身邊：「媽咪！係咪真㗎？」

媽媽用哀怨眼神望住太太。

媽媽：「未知係咪㗎⋯所以要睇醫生啦⋯」

小妹妹邊喊邊拍打媽媽個肚：「我唔要細佬呀！我唔要呀！」

媽媽捉住妹妹嘅手：「唔好再打媽咪啦好冇，媽咪會痛㗎～」

小妹妹：「我唔要呀！你哋應承咗我錫我一個㗎！我唔要細佬細妹呀！唔要呀！」

太太：「小妹妹，唔駛咁擔心呀，而家有都唔代表真係有㗎！有好多都係過眼雲煙嚟㗎咋！死咗都唔定㗎！你頭先咁打都可能死咗喺入面㗎啦！」

傻的嗎⋯

人嚟！同我拖個多口太太岀去掌咀！唔變孖潤腸唔俾返嚟！