【好物分享】3秒自製「波波飯糰」神器

據了解，BLW理論係著重BB自己手拎食物，感覺該食物嘅觸感同埋直接食入口嘅口感。如果個BB食得叻呀，就算係幾個月人仔都可以自己食雞槌添呀。(嗱！唔識唔好亂學呀！人地BB唔同你個BB呀！人地得唔代表你得！)有媽媽就問Hody  Ma：「咁將食物全部切到一條條咁，佢地咪以為全世界嘅食物都係條狀囉！」嗯，呢個問題我都唔識答，我又唔係專家。不過我估可以畀佢食之前睇睇每種食物原本個樣，等佢地認下先嘅。又有媽媽問：「咁畀佢地習慣咗用手自己探索食物，第時大個會唔會打邊爐都用手食架？」喂呀，係咪想笑死我呀？我點知啫，個個BB都唔同架嘛！
好啦，我地又正經講返BLW先，菜莖、紅椒、黃椒或者長通粉等就可以一條條咁自己拎住食啫，咁米飯又可以點搞呢？白飯細細粒咁，BB好難拎住食喎。

今次就為大家介紹一下呢個喺BLW媽媽界相當受歡迎嘅自製「波波飯糰」神器，只要將適量嘅熟米飯放入呢個神器入面，上下搖兩搖，3秒即可製成一粒粒圓圓嘅「波波飯糰」，放幾粒落個Happy Mat上面其中一格，BB就可以好方便咁一手拎住一個「波波飯糰」食喇！

將米飯整到一個波波咁，就可以方便BB一手拎住一個自己食。佢覺得好玩時，你又睇佢食得開心，雙嬴！

呢個整波波飯糰工具喺邊買？就係12蚊店喇！仲有好多其他選擇架，不過今次介紹橙色包裝呢款就可以一次整3粒飯糰，好搶手架！成日一返貨就被掃晒，手慢無呀！(真係唔係廣告，純分享。)

除咗BLW之外，等BB大個啲又可以繼續用佢黎整得意便當，唔怕佢嫌悶唔肯食飯。

最後等Hody Ma戴返個頭盔先，咁樣整到啲白飯一個一個波咁，呢個做法如果放落BLW理論入面，BB又會唔會以為白飯原本就係一個個波咁呢？媽呀！咁點好呀？我好亂呀！等我下次搵個真正BLW專家又或者醫生問下意見先。