【絕對唔講得系列】10句一講即撻著新手爸媽嘅說話

天下父母都愛鍚自己嘅仔女(生完個B掉出街唔要果啲變態另計)，尤其新手父母要迎接新生兒，壓力真係好大架，所以對住佢地，千祈唔好講以下說話，如果唔係真係一撻即著！其實有時候，沉默都係一種美德！

BB抓損自己塊面面，真係好平常(而且過程好快)。父母都唔想，唔好話佢地冇睇實BB啦！

新手父母為小朋友擺百日宴、搞Party，就梗係整得靚靚地架啦，見到都開心啦！唔通肉肉酸酸好咩？

以下是Hody Ma嚴選嘅《10句一講即撻著新手爸媽嘅說話》，全部都係真人真事、唔係老作架！

1.「你仔/女咁奀咁瘦嘅？你冇比飯佢食呀？」
個個人身型都有唔同，肥就好咩？健康咪得囉！
2.「你阿B幾多磅呀？人地阿邊個個B出世__磅呀！」
人比人、比死人呀！唔好比較啦，每個BB都係獨一無二架！
3.「點解你女咁架，有濕疹，陰公囉！」
嬰兒有濕疹真係好常見，父母見到其實都會肉痛，唔使再Remind人地一次架，唔該多謝！
4.「都話你啲後生唔識教又唔識湊，搞到BB有濕疹！」
BB濕疹真係唔係父母搞出來架，冤枉呀包大人！
5.「嘩，你今日嫁女呀？」
見你百日宴場地整個佈置咁靚，某親戚一來到就對住你咁講！
6.「嘩！使唔使整到咁誇張呀！」
見你百日宴場地佈置咁靚，另一個唔多熟的親戚細細聲咁講！
7.「嘩！咁大個仲要人抱呀？」
阿大哥！BB仔又未識行、未識企，仲要未識坐，唔抱住可以點呀你教我喇？
8.「點解你個仔XXXXX？點解你個仔XXXX？點解你個仔XXXX？」
點解你咁多點解？點解我個仔XXXX會關你事啫？
9.「係咪你冇睇實佢呀？」
發現阿B畀蚊咬/自己抓損咗/撞瘀咗，然後對住你咁講！
10.「而家啲小朋友咁短命咩？要個個月都切蛋糕慶祝生日！」
呢句真係終極！唔係吹水，Hody Ma身邊真係有人發表過咁嘅言論，不過唔係對住我講，佢好彩！