【英文本色】Anthony應該發th音嗎？- 魏徵

有人會爭論，既然 Anthony 這個名字中間是 th，那個 th 音就必定要發出來才是正確。其實除了 Anthony，還有好幾個名字會有 th，例如女仔名 Esther 和 Theresa。究竟這些名字的讀音應該怎樣處理？

先講 Theresa，因為最多人會讀錯呢個名。首先，這個 th 必定是發 t 音的，即是當佢 Teresa 咁讀就啱啦。你夾硬將個音 th 發出嚟，讀 THE-re-sa，一定係錯。不過，讀呢個名，最多人錯嘅地方都唔係開頭個 t 音，而係後面個 sa 音。

這個 sa，應該是發 za 音，即是那個 s 要「震」住咁讀出嚟，讀 Te-re-za。講開 z 呢個震音，其實 Susan 絕對唔係讀「Su 神」，因為中間個 s 係發 z 音，應該讀 Su-zan。

同樣地，Esther 呢個名個 th 音都係好似 Theresa 咁處理，即係讀 Es-ta 就啱啦。不過，都會小部份美國人鍾意讀 Es-THER。

英國有條好出名嘅泰晤士河，英文係 Thames，點讀？好多人會覺得呢個名應該拆開嚟睇，即係 Th 加個 ames，而 ames 嘅讀法，就等同 names、games、James個 ames 咁讀，然後前面就加番個 Th 音，咁就錯晒。

呢條河名，個 Th 只能夠讀 t 音，成個名就係 temz。留意，最後面個 s 又係要震住嚟讀。

講咗咁耐，到底 Anthony 呢個名應該點處理？答案係，中間個 th，發 th 音又得，發 t 音亦得。英國人多數會發 t 音，而美國人就兩個都會讀。