【史高治叔叔】見到執紙皮老人　教阿囡做有骨氣嘅人

好耐無睇電視，因為成日覺得無咩電視節目真係好吸引，點知今次一開電視，就見到一個特輯，係講一班執紙皮嘅老人家，吸引史高治睇哂。其實，內容唔算好新奇，走喺街上點都會見過老人家推車仔執紙皮，好諷刺地，總係有人吹噓香港幾繁榮，而老人家執紙皮呢個情況多年嚟一直都存在。內容雖然唔新奇，不過史高治覺得都啱同阿囡一齊睇，一邊睇，就一邊傾吓。

「阿囡，有無見過啲好似電視裡面嘅老人家咁呀？」

「有呀，我見過呀！推住啲紙皮好重咁，點解佢哋要咁辛苦？」

「不如睇下電視裡面班老人家嘅故事。」

有位老人家話自己有手有腳，唔想攞綜緩。史高治都聽過一啲低收入人士同老人家咁講，不禁講句：「真係有骨氣。」

阿囡問：「咩叫骨氣？」

「即係堅守人格、個人原則、尊嚴，唔會因為一啲誘惑或利益而屈服。就好似呢位老人家，佢好努力靠自己能力去生存，雖然我就覺得以佢呢個年紀攞綜緩無咩問題，不過既然佢有咁堅定不移嘅信念，我真係好尊重佢。」

節目有講到因為內地進口廢紙價格大跌，長者工作朝七晚九，每日先得幾十蚊，都未必夠食一餐。電視裡面個伯伯仲因為無錢買鐵車，所以用繩索去拉紙皮，見佢拉得好吃力，睇到呢度，心都酸埋。

阿囡都顯得有啲擔心，問：「得咁少錢，如果整親都無錢睇醫生啦。」

「社會係有一班基層，生活喺貧窮線之下。唔係個個都好似我哋三餐無憂，所以我哋要珍惜同感恩呀！」

「知道！」

後嚟有個個案比較有趣，有個婆婆唔係因為無錢去執紙皮，相反佢本身已經有啲環境，佢話係為咗環保，覺得街上少咗紙皮就會乾淨啲。

史高治正想開口時，阿囡已經好醒目咁講：「我哋唔可以浪費地球資源，可以重用回收嘅嘢就要重用回收。」

「啱呀，叻女！人人都有責任去保護地球。」

節目播完，都有幾個信息帶咗俾阿囡，係咁架啦，做咗人哋老豆之後，睇到啲咩嘢，都會成日會諗住點引導阿囡去思考同學習，希望佢成為個正直、善良嘅好人。

諗返起電視裡面嗰班咁有骨氣嘅老人家，真係好佩服佢哋，不過政府都係要盡快落實全民退休保障，等班老人家可以過較舒適嘅生活。相反，有一啲唔係長者，而係有手有腳而唔肯搵工嘅人，實在要查核佢哋有無濫用綜緩。有啲人本身內地有資產，甚至有田有地，喺香港一蚊稅都無交過，但係落嚟就攞綜緩同住公屋，呢啲情況政府都要正視。希望濫用社會資源嘅人，可以睇吓呢個節目，學班執紙皮嘅老人家咁有骨氣，就算年紀咁大，都唔怕日曬雨淋去工作，呢啲先會得到尊重。

作者：史高治叔叔（facebook專頁按此）
　　　後生嗰陣，大學一畢業就入咗大銀行商業部做Sales，跟一班有名有利嘅客人打交道，有時可以跟埋一齊飲飲食食，花天酒地、燈紅酒綠嘅生活，造就今日呢個身經百戰又識玩識食嘅叔叔。不過自從做咗老竇之後，史高治叔叔修心養性，決定將行內鮮為人知嘅見聞，喺專欄裡面一一公開。