【史高治叔叔】第一次上嚟飲呀？順得人唔收人情真心請你

話說上星期，史高治去咗順德一場喜宴，係一個順德朋友娶新抱，飲宴地點係五星酒店，考慮到當地物價應該都係比香港低，而史高治又一個人出席，所以做咗封1,000人仔嘅人情。

去到場地，唔見有reception收人情，於是去搵請我飲嗰個朋友，一見面，當然講返句好說話：「恭喜恭喜！恭賀新翁之喜！」講完，正常就遞上人情，之後一幕就令史高治呆一呆，朋友掂一掂個封，就無收個人情。史高治思考緊發生咩事嘅時候，見其他賓客一樣遞上人情，佢又係掂一掂，又唔收。嗯，史高治估佢真係唔收人情啦。

坐埋位見到一個朋友，史高治同佢提出心裡呢個疑問，朋友就笑住話：「第一次上嚟順德飲呀？我見啲順德人好似係咁架，有啲仲加多十蚊入你個利是封先俾返你，佢哋請你嚟飲，真係請你架！」

「嘩，咁咪會蝕錢？」

「嗯，係香港呢，我哋係會咁諗，我當年結婚請飲，都會好老土咁諗，請邊個嚟可以收多啲人情……」

「咪就係，唔好話賺錢呀，至少唔好蝕咁多呀。」

「但係我試過去順德飲之後，就真心覺得自己太小家。佢哋真心想請你嚟飲，一啲都唔同你計較，真係幾有人情味，單純想同你分享喜悅。」

「唔怪之得啲人話順德人順得人啦，咁順人意！」

朋友突然指一指遠處，問：「你認唔認得嗰個客人？」

「有啲熟面口，報紙見過？」

「咪XX地產商個老細嘛。」

「係喎，我哋個朋友係呢間地產商嘅非執行董事，請埋佢老細嚟都好正常呀。」

再仔細望一望呢位有錢佬，都嚇一跳，身家幾百億嘅老闆身穿大碼西裝，西裝有啲鬆，而佢腳下──係踩住對涼鞋！佢啲腳趾仔好清涼呢！隨意到呢，但又真係幾可愛。

成個喜宴裡面，覺得主人家表現出嚟係簡單純樸，唔會太過鋪張，同史高治之前聽聞一啲大陸喜宴嘅情況好唔同，要啲賓客人情做成叠銀紙、主人家收金器收到新娘變黃金戰士。史高治同朋友一講，佢就笑位話：「睇下邊區啦，有啲誇張到上埋新聞都有，不過一般嚟講，順德係較純樸。各處鄉村各處例，中國咁大，大把嘢睇。」

有時諗起啲三姑六婆大唱邊啲親戚朋友俾人情俾得少，唱足幾十年，唱到街知巷聞，覺得真係幾無謂，搞喜事搞到唔開心，斤斤計較，咁又為乜呢？無論如何，今次去順德飲，令史高治感受到順德人嘅隨和性格，日後有機會都可以搵個周末帶埋老婆阿女上去行吓，同一圍枱嘅順德朋友仲介紹話有生態樂園、花卉世界等，聽落好似都幾啱親子遊。

作者：史高治叔叔（Facebook專頁按此）
　　　後生嗰陣，大學一畢業就入咗大銀行商業部做Sales，跟一班有名有利嘅客人打交道，有時可以跟埋一齊飲飲食食，花天酒地、燈紅酒綠嘅生活，造就今日呢個身經百戰又識玩識食嘅嘅叔叔。不過自從做咗老竇之後，史高治叔叔修心養性，決定將行內鮮為人知嘅見聞，喺專欄裡面一一公開。